Santibañez el Alto

Archivo: Abril 2006

Ajetivus

29/04/2006

Voy a ponel una serie d'ajetivus n'ehtremeñu que se palra en Santibañiz el Altu, y que deseguru en casi to los pueblus d'alreol.

Abisinu: Con mala idea.
Aciburrau: Adormilado.
Ahinau: Angustiado.
Acirrutau: Cagao de miedo.
Ahinau: Angustiado.
Garbana: Vaga, sin ganas de hacer nada.
Alabanciosu: Vanidoso.
Albeharucu: Bruto.
Alipendi: Pícaro, golfo.
Alpistau, alquitanau, chihpu, trageau,: Bebido.
Amonaú: Mirar algo atontado.
Arañon, maninah, engarañau: que se le cae todo.
Arbeharucu: Bruto.
Arreciu, engarromiañau: Helado de frió.
Cagahón/a: Persona pequeña.
Cagamajá: Inquieto.
Calabuzu, calabuzón, calabuzu rozaol: Cabezota, obcecado, torpe.
Calandria: Mujer bromista.
Carcabu, ehcuchumizau, : Delgado.
Cascuerzu: Mal educado.
Cegalutu: Ciego
Cerril: rebelde.
Chamangon: Chapucero.
Chihpoletu: Vivaracho.
Chincharretu: Persona que no puede guardar un secreto.
Chirichi: De pocas luces.
Chirulatu: Bobo
Cucufata: Presumida.
Escambarilá: Coja, que anda mal.
Esgalamiu: Muerto de hambre.
Esguardamillau: Desencajado, mal hecho.
Esfarfayau: Mal hecho.
Esfarragua: Mal vestida.
Ehcuerzu: Hombre viejo y de poco valor.
Ehfinfarrau: Despilfarrador.
Ehgalichau, Ejarapau: Mal vestido.
Ehpantahu: Mamarracho.
Ehpelucá: despeinada.
Encoruhau: Jorobado.
Encuahinau: cabreado.
Enfurruscau: Enfadado.
Engarniu: Inútil.
Enharreta: Cansada.
Enterrosiu: Odiado
Fachandosu: Chulo.
Fandangau: Desaseado.
Farrandaca/u: Juerguista.
Guardiñu/a: Ahorrador, avaricioso.
Gurriminu: Persona pequeña.
Halamiu: Ansioso, ambriento, avaricioso.
Huricheru: Curioso.
Jateau: Trajeado.
Jaragan: Vago.
Jentiñosu: Antipático.
Jodiu/a: Tener poco talante.
Lambuzu, lambuceru: Goloso.
Lanteru: hablador.
Lenguarú: Bocazas.
Leuu, leua: Flojo.
Lúntriga: mujer espabilada.
Machu pindongu: Marimacho.
Mandilón: Calzonazos.
Manfloritu: Hermafrodita
Mezucon/a: fisgon/a.
Mostrenco: Burro, bruto.
Morru: Enfadado (Estal morru.
Pamplinosu: quejica.
Panduerga, Panduergona: Gorda.
Papelon/a: pelota.
Pehiguera: Dar la murga a otra persona.
Peluhtrana, Pelandrusca: mal vestida, sucia.
Pencu/a: Torpe.
Perillan, perigallu: Pícaro, Chulo.
Prenda: Cariño.
Rabua: Mujer con mucho genio.
Rehileti: Que anda con garbo.
Relambiu: Repeinado, chulo.
Rengu: Cojo.
Repegajosu: Que no se separa de otro.
Repiau: Loco.
Secarón: Hombre delgado.
Sel l?acabosi: Ser muyyyy pesado.
Sobero: Persona que no se separa de otra.
Tallu/a: Alto/a.
Zahinu/a: Malicioso.
Zancarullu: Torpe
Zarabatu: Tartamudo o que vocaliza mal.
Zarriu/a: De poco valor.
Zurrupiu: Antipático.

Ver/Escribir Comentarios (1)

Ehtremeñu

29/04/2006

Nu va a sel esti blog miu pa jadel denguna gramatica ni izionariu n'ehtremeñu, ni muchu menus. Nu creu que tuviera pacencia ni cencia pa jadelu. Peru si quieru dil poniendu palabrinas y vocabulariu en usu qu'entavía puedi sentilssi enas callis 'e muchus pueblus, aparti craru d'escribilu comu poeis leelu agora mesmu.

L'ehtremeñu tieni poca o dengun prestijiu, ni tan siquiera entri los propius ehtremeñus, cona dificultá añaia que nu tenemus o nu queremus seguil denguna jorma 'e las emprentás pa jadelu, mus alcontramus con diferentis grafias pa las mesmas palabras y la su pronunzación comu en Jadel, Hadel, Hacel, Hacer, Jader etc. Comu tengu ichu, nu va a sel el mi blog andi vaya a sental catedra de comu tieni que sel, asin que alantri comu pueu seguidre escribiendu asina.

É curiosu comu ena propia Ehtremáura nu se quieri la su palra e incrusu se le tieni arregañu muchas vedis. Endispués de sentil tantu tiempu que palramus mal creu que lo tenemus creiu 'e veras y los propius viejinus jadin efuerzus pa palral comu ellus crein que tieni que sel, anque gracias a quien seya entoavia los jovinis poemus sentil, esu si endentru las casas la mayol las vedis, toa una serie 'e palabrinas, girus y ehpresionis propias que mus alcompañaran por siempri.

Jadi unus días a aconteciu la polemica entri el BNG y la Junta Ehtremáura a tenol la Fala 'e los tres lugaris. Lejus 'e idil que toa ayua sedria bienvenia y el dal a conocel y promocional esta singulariá lingüística, deseguia an chiscau la sensibiliá polo muestru creyendu que mus lu diban a arrepañal. Nu se si sedra güenu o malu, peru nu me peta que se afechin los temas asin, diendussi a problemas o asuntus politicus. Señoris las palras y las falas nu son de naidi mas que de los palrantis o falantis y to efuerzu pa que sobrevivan é güenu y necesariu, mas si cabi nel muestru casu.

Poemus idil que n'Ehtremáura ay o a abíu conflitu lingüíhticu entri el castellanu y el ehtremeñu. L'ehtremeñu a díu perdiendu poquinu a pocu el espaciu publicu y privau en favol el casteanu, anque esti nu seya el castellanu standar, sinu un castellanu ehtremeñizau. En poquinas generacionis sa perdiu la palra, la palra ena que los muestrus agüelus palraban entri ellus y ena que entoavía puedin jadelu en'algunus lugaris , peru los muestrus padris ya tienin terrenu perdiu frenti al castellanu que palran o paedin una diglosia. Estu é que sabin y puen palral ehtremeñu, anque mu castellanizau peru comu nu é la palra 'e prestihiu, solu lu jadin en el su ambitu privau, pa usu informal. Asina la palra pasa de sel minoritaria a sel tamién minorizá polos propius palrantis.

Asin jadi tres generacionis en abondu pueblus se palraba n'ehtremeñu, peru a la siguienti generación se le jadia en castellanu ehtremeñizau y agora que mus quea?? Un castellanu con acentu ehtremeñu y abondu palabrinas mu muestras que nu tienin sentiu juera Ehtremáura.

Pue paecel pesimista, peru l'ehtremeñu anda a dal las últimas boqueaes sinu jademus algu. É mestel que mus pongamus las pilas y saquemus a l'ehtremeñu del jochi inorancia nel que lu tienin metiu y salga a la calli, a las prazas y nu sentamus vergoña 'e idil gañitandu juerti, semus ehtremeñus y palramus asina.

Ver/Escribir Comentarios

Santibañiz el Altu

29/04/2006

Santibañiz el Altu

El pueblinu 'e Santibañiz el Altu jué fundau pola Condesa francesa Teudosinda y el su hiju Teobaldu Montesinus allá por el añu 812. Nun principiu jué levantau en lo que se conoci comu "La majá l'espinu" p'alúu llevalu p'andi esta agora por razonis defensivas.

Al principiu el nombri 'el pueblu jue Santi Joanes debiu a la ermita que jidu costruil la condesa pa entierral al su mariu el Condi Grimaldu, endispués pasu a llamalssi San Juan de Mascoras o Masculles pal final llamalssi Santibañiz el Altu.

Por el pueblinu anduvun los Templarius, la ordin d'Alcantara y Los Maestris.

EL castillu jué costruiu sobri los sigrus XI y XII polos Templarius 'e la Ordin 'el Pereiru, endispués la Ordin d'Alcantara y jué visitau a lo largu l'estoria polos reyis Alfonsu XI, Fernandu II y Alfonsu IX. Era la epoca la reconquista y la sierra toa era un lugal estrategicu pa acontinal la reconquista pal sul.

Entoavía pue velssi la muralla anque el restu 'el castillu nu esta en mu güenas condicionis.. Ena praza d'armas esta el vieju campusantu 'el pueblu.

Dendi las murallas pue guipalssi el Jalama, Puertu 'e Peralis y las jañonas, asin comu parti 'e la sierra.

Otrus monumentus pa visital son la Igresia San Pedru, con portá gótica jecha a finalis 'el sigru XV y la ermita 'el Santu Cristu 'e la Victoria del sigu XVI, asin comu la picota o rollu jurisdiccional del sigru XVI.

Dendi Santibañiz pue guipalssi gran parti 'e la sierra y dendi casi cualisquiel puntu 'e la sierra pue guipalssi Santibañiz debiu a la su altura. Puen velssi las jesas d'encinas, el embalsi 'el Borbollón (qu'esta en terrenu 'el pueblu), los regatus y rius comu el Tralgas y Árragu y lo mas puliu los atardeceris cuandu el sol anda a guardalssi.

Las fiestas se jadin el 9 y 10 de juniu en onol a los santitus San Primu y San Felicianu , tamién se celebra San Juan el 24 'e juniu y os dias 14 y 15 'e agosto la fiesta 'el emigranti.

Ver/Escribir Comentarios