Santibañez el Alto
28/05/2006
Sigun relata Gonzalo Martínez Díez nel su articulu "Extremadura: origen del nombre y formación de las provincias", espublicau nel Anuariu ?e Derechu de l?Univelsiá d?Estremáura, se pue establecel las siguientis fasis o momentus estóricus:
-En 1502 nacin las primeras 18 provincias de Castilla en hunción de las ciuais con votu en cortis, nu estandu entri ellas dinguna ?e las estremeñas. La mayol parti el territoriu estremeñu dependía altoncis de la provincia ?e Salamanca.
-En 1653 mercan un votu enas cortis, y polo tantu se crea pol primel vedi la provincia estremeña, las ciuais de Plasencia, Badahó, Méria, Truhillu, Cázris y Alcántara. Nesta provincia s?integran lus partius de Truhillu, la provincia ?e Lión de la Ordin de Santiagu (La autual comalca pacensi Tentudia) asín comu Coria y las tierras ?e Granailla.
-En 1789 el Condi ?e Floridabranca espublica una lista colas 38 provincias d?España, entri ellas la d? Estremaura, dividia en ochu partius: Alcántara, Badahó, Cázris, Llerena, Méria, Plasencia, Truhillu y Villanueva la Serena.
Entri el mapa ?e 1789 y l?autual ay tan sólu 20 poblacionis de Cázris que pertenecían a otras provincias:
El Gordu, Berrocalehu, Bohonal de Ibor y Talavera la Vieha a Ávila.
San Martín de Trevehu, Villamiel, Descargamaría, Robleillu ?e Gata, Bañus, La Garganta y Hervás a Salamanca.
Castañar de Ibor, Peraleda de San Román, Garvín, Valdecasa de Tajo, Villar de Ibor, Carrascalehu, Guadalupi y Alía a Toledu.
D?igual mou, eran sieti las poblacionis que un estaban encluias altoncis n?Estremadura y que oy pertenecin a Badahó: Valdecaballerus y Castilbrancu, situaus en Toledu. Higuera la Real, Fregenal de la Sierra y Bodonal de la Sierra en Sevilla. Olivenza y Táliga que pol altoncis eran portuguesas.
-En 1810 el gobielnu afrancesau estableci las prefecturas de Cázris y Méria.
-En 1822 se establecin las provincias de Cázris y Badahó. Nesta división, mu paecia a l?autual, entovía queaban poblacionis huera ?e las provincias de Cázris (Casaris de las Hurdes, Ladrillal, Nuñomoral, Pinofranqueau, Caminumoriscu, Descargamaría, Robleillu ?e Gata, Casal de Palomeru, La Pesga, Valdelacasa del Tahu, Villal del Pedrosu, Carrascalehu y Alía) y Badajoz (Valdecaballerus, Castilbrancu, Herrera ?el Duqui, Helechosa, Tamurehu, Fuenlabra lus Montis, Villarta lus Montis, Garlitus, Baternu, Peñalsordu, Capilla, Azuaga, Puebla el Maestri, Huenti l?Arco, Valverdi de Llerena, Malcocinau, Higuera la Real y Huentis de Lión.
-En 1833 se hadi l?autual división de provincias y sus poblacionis. Asin ya se contituyin las dos provincias de Cazris y Badahó la rehión d?Estremáura que agora tenemus.
- En 1978 se costituyi la Comuniá autonoma d?Estremáura y los sus limitis son lus mesmus que la rehion del mesmu nombri qu?esistia anteriolmenti.
Apañau d? Extremadura GenWeb
15/05/2006
ALANTRI EHTREMAÚRA
Alantri, Ehtremaúra, alantri, alantri,
Que mentrih puamuh aliental,
Dengunu te barrundirá;
Que mentrih puamuh aliental,
Ya no t' atollaráh.
De continu, yo runcharé
Con'a cahtúa pol pinsión;
Encima el suelu ehpenaré,
Pol efendelti, yo.
Alantri, Ehtremaúra, alantri, alantri,
Qu' arrempuhandu toh pol ti,
El mehmu sol t' embidiará;
Que labutandu toh pol ti,
De pobrecia saldráh.
Sempri en tu onol, queremuh sel
Un ñu d' unión, flama d' amol;
Embahu el cielu sempri adul,
Yo te quedré mejol.
PABLO GONZÁLVEZ GONZÁLEZ
12/05/2006
L'otru dia huricheandu ena redi m'alcontre con un blog andi tenian endilgau un escritu sobri la posibiliá que l'ehtremeñu juessi ofidial. Soñalssi é de valdi y güenu m'alcordau que n'otrus tiempus cuandu particiepaba nun simulaol politicu colos collacius Asturianus y Lionesis ena jormación d'un estau endependienti reahte argu paeciu a estu mesmu. Nu ehan 'e sel barruntaeras y cavilacionis d'un juturu que de siguru nunca sedrá peru güenu el soñassilu nu cuesta ná.
NORMALIZACIÓN LINGÜÍHTICA
- LA PALRA Y UÑIÓN SOCIAL
La Hunta Ehtremáura tieni conocencia que la comuniá lingüíhtica d?Ehtremáura é patrimoniu ehtóricu y atual de Cazris y Badahó, ensiendu mu compleha, rica y diferenti en toas las zonas. Atualmenti en to?l muestro país se puede oíl Ehtremeñu, A Fala del Val de Xalima, asín comu el portugués en diferentis puebrus.
Consideramus que la palra é un elementu ?e uñion social. Equilicua, qu? é mestel defendela y dessarrollala, medianti?l labutu los poeris púbricus, garantizandu el drechu ?e tos los ciuaanus a conocela y a comunicalssi ena su palra, en cualisquiera ?e los ámbitus propius ?e la ehpresión lingüíhtica, tantu enas ehcuelas, en tos los sus nivelis, comu enos meyius ?e comunicación y enas dihtintas Alminihtracionis púbricas.
El labutu n? esta materia debi d?inicialssi d? un mou inmediatu, pola difícil situación ena que s?alcuentra la palra comu ihtrumentu d?interrelación d?una parti ?e la población d?Ehtremaúra. Tenemus comprobau qu?en amplias zonas no se jadi ?l relevu heneracional, de mou que essihti?l riehgu ?e remplazu total del ehtremeñu pol cahtellanu.
Veleí que la Junta, precura desarrollal programas pala normalización del usiu l?Ehtremeñu nel conhuntu ?e la muestra Comuniá, siempri dendi la prehpehtiva ?el rehpetu mássimu a la realiá sociolingüíhtica. Esti asuntu essihi conocel, adatalssi y planifical d?alcuerdu colas peculiariais propias de ca una ?e las zonas sociolingüíhticas, ya que é evidenti que no se pué ehercel nesta materia ?el mihmu mou ena zona Gata-Jurdis qu?ena Siberia o ena Campiña Sul. Las capitalis y las grandis ciuais tamién debin ?e tenel el su propiu plan de normalización lingüíhtica, sin pelhuiciu ?e la essihtencia d? un plan diretol heneral. To ellu d?alcuerdu cola Ley Principal de Normalización del usiu l?ehtremeñu.
La política a desarrollal debi ?e tenel comu metas obligás los siguientis ohetivus:
1.- Aumental el númiru d?ehtremeñu palrantis.
2.- Mehoral la su competencia lingüíhtica.
3.- Amplial el repertoriu ?e huncionis y ámbitus del usiu l?ehtremeñu.
4.- Reforzal el miramientu l?ehtremeñu comu patrimoniu ?e toa la socieá, independientementi ?e la su ideolohía política.
- ATUACIONIS EHPECIFICAS ENA EDUCACIÓN
1.- Creación dun sihtema educativu con diferentis moelus (A y B ), remozandu la presencia l"ehtremeñu nel moelu A, luengua a la que se otorgaría un valol vehiculal ena enseñanza d?arguna ?e las árias o asinaturas. Sinembargu, creemus necesariu tendel a la superación paulatina d"esti sihtema y a la implantación d?otru, bilingüe, más integraol y flessibli.
2.- Labutación ?e planis que puean mehoral la caliá y cantiá ?e la oferta ?e librus "e tehtu, librus de consulta y cualisquiera d?otru tipu ?e material ehcolal ena palra ehtremeña.
3.- Cudiu ehpecial a la jormación ?el profesorau en to lu tocatimenti a la su capacitación lingüíhtica. É mehtel amplial la redi ?e centrus andi puean deprendel y mehoral las sus competencias lingüíhticas , animandu al profesorau, ahtualizandu el material diáhticu,?
4.- Favorecel l? usiu l?euhtremeñu comu palra ?e relación polos dagalis juera ?el ámbitu ?e las ehcuelas, creandu ahtiviadis con caráitil ehtraehcolal, deportivu, tiempu libri?
Al rehpehtivi l?anseñanza universitaria:
1.- Apuehta deciía pol una Universiá plurilingüe.
2.- Alivial el déficí essihtenti ?e profesoris que seyan ehcapacis lingüísticamenti n?ehtremeñu. Pa ellu, debin reahtalssi y ahilal planis pa deprendel y ehtuyu nel conocimientu ?e la muehtra palra pa poel conel tiempu enmendalssi esta situación.
3.- Apoyu a la invehtigación en y sobri l?ehtremeñu.
12/05/2006
Ná que nu se por qué nu endilgue esti vidiu antis. Güenu, esperu vus peti, lo jidi jadi un tiempu pa afechal la bocona d"unu que idia qu"ehtremáura era ó desieltu y los topicu "e siempri; lenguarus cutaus que nu sabin andi tienin la manu derecha... peru que por esgracia los ay
Lu sientu polos pacensis peru comu conozu mas Cazris poquinas afotus ay de palli.
07/05/2006
El cumpliañus del Principinu
El principinu d'Antoin Saint-Exupery a cumpliu añus n?estas últimas semanas. Ya tieni 60 añus y 7 dendi que deprendio ehtremeñu gracias a Antoniu Garriu.
El principinu é el libru juntu cona Biblia y el Capital de Marx mas trauciu.
Aojalá ubiera mas librus emprentaus n'ehtremeñu, nu puey sel que la palra quey relegá a las poesias. Nu é por jadelis 'e menus peru chega un momentu que petaria leel otras cosas n'ehtremeñu a parti las poesias y toas las propuestas oltograficas y gramaticalis que s'alcuentran ena redi (las que creu que naidi jadi casu, escomienzandu por mi mesmu).
Ay que sacal l'ehtremeñu de los pies 'el braseru d'endentru las casas, sacalu a la calli en tos los sentius. N'ehtremeñu se puey jadel el amol, se puey jadel matematicas, deprendel otra palra, jadel la matancia, filosofal, dal una clasi d'anatomia y dil a mercal a la praza. Ay que vivilu, sentilu, querelu dali el valol que le quitarun y to esu sin tenel la necesiá d'una catedra, sin aceamia 'e la palra.
Gúenu voy a ehal una mijina 'el libru pa que asina los que nu lo tengan puean guipal lo puliu que quea y asina dilssi nun verbu a mercalu.
La mi vida es un aburriéru. Yo cazu gallinas, los jombris andan a cazalmi. To las gallinas se paecin, y to los jombris se paecin. Asina que m'aburru una miajina. Pera, si me domesticas, la mi vida será coma alumbrá pol el sol. Destenguiré deseguía un ríu de pasus qu'haberá de sel diferenti al de to los otrus. Los otrus pasus me jacin escuendelmi baja tierra.
El tuya jadrá qu'asomi p'ajuera 'el jochi, comu una música. ¡Y amás mira! ¿Ves velaí abaja los trigalis?. Yo nu me jincu el pan. El trigu pa mí es inútil. Los trigalis nu me train dingún recuerdu. ¡Y esu, es tristi! Pera tu tienis cabellus colol oru. ¡Altoncis va sel maravillosa cuandu m'haigas domesticáu! El trigu, qu'es doráu, jadrá acordalmi de ti. Y m'ha gustal el ruíu 'el vientu en el trigu...
El zorru se calló y estuvu mirandu una tupa tiempu pa?l prencipinu.
-~Pol favol... domestícami! -iju
-Bien quedríe yo, respóndió el prencipinu-, pera nu me vaga muchu. Tengu amigus pol descubril y una tupa cosas que conocel.
-Solu se conoci lu qu'ha síu domesticáu, -iju el zorru-. A los jombris nu les vaga ni pa conocel na. Mercan to jechu an ca los vendeóris. Pera comu nu esistin pa na vendeóris d'amigos, los jombris ni tienin amigus. Si quieris un amigu, ¡domestícami!.
-~Qu'es prejisu jadel? -iju el prencipinu.
-Es prejisu tenel mucha pacencia, -respondió el zorru-. Al prencipiu, vas a tenelti que sental entovía un pelma arretiráu de mí, asina, ena yelba. Yo miraré pa ti de respajilón y tú nu tienis qu'idil na. El lenguaji es juenti de malentendíus. Peru ca día, vas a poel sentalti un poquinu más cerca.
A mañana vinu el prencipinu.
-Juera síu mejol venil a la mesma hora, -iju el zorru-. Si vienis pol ejempru, a las cuatru la mentrasiesta, endi las tres voi a escomenzial a estal yo felí. Contri más s'acerqui la hora, más felí voi a estal. Dás las cuatru, ya estaré yo to pendientitu y encalmáu vivu; ¡descubriré el preciu la felicidá! Peru si vienis cuandu te s'?antoji, na voi a puel sabel enjamás a cuala hora ejal aviáu el mi corazón... Es prejisu qu?haiga ritus.
-~,Qu'es un ritu? -iju el prencipinu.
-Es algu tamién olviáu abondu, -iju el zorru-. Es lu que jadi a un día sel diferenti, a una hora, de las otras horas. Los cazaóris, pol ejempru, se gastan un ritu. Los juevis andan de baili con las muchachas ?el pueblo. ¡Altoncis, el juevis es un día maravillosu! Me voi de paseu renti a los parralis. Si los cazaóris estuviesin de baili cuandu se les antojasi, to los días serien apecíus, y me quearíe sin vacacionis.
Asina qu'el prencipinu domesticó al zorru. Y cuandu la hora la ía estaba prósima:
-~Ah! -iju el zorru-... Voi a lloral y to.
-Es po-la tu culpa, -iju el prencipinu-, yo nu quería jadelti mal dengunu, pera tú quijisti que te domesticara...
-Craru, -iju el zorru.
-~Pera si vas a lloral y to! -iju el prencipinu.
-Craru, -iju el zorru.
-~Altoncis nu salis ganandu na!
-Si salgu ganandu, -ija el zorru-, pol causa 'el colol 'el trigu.
Aluegu añadió:
-Vaiti a vel de nuevu a las rosas. Comprenderás que la tuya es única en to'l mundu. Güelvis endispués a idilmi adiós, y te jadré el regalu d'un secretu.
El prencipinu se jue a vel las rosas de nuevu:
-Vusotras nu seis apaecías a la mi rosa ni pa na, vusotras nu seis na entovía -las iju-. Naidi vus ha domesticáu ni háis domesticáu vusotras a naidi. Vusotras seis comu era el mi zorru. Nu era más qu?un zorru apaecíu a cienmil zorrus. Pera yo le jidi el mi amigu, y es agora únicu en to'l mundu.
Y las rosas bien rescocías que se pusun.
-Vusotras seis bellas, pera estáis güecas pol drentu, -las iju entovía-. Nu mereci la pena moril pol vusotras. De siguro qu'un simpli caminanti puél llegal a creel que la mi rosa se paeci a vusotras. Pera ella sola es más emportanti que toas vusotras, puestu qu'ha síu a ella a la cuala regué. Puestu qu'ha síu a ella a la cuala pusi embaju un globu. Puestu qu?ha síu a ella a la cuala maté las orugas (salvu dos a tres pa las mariposas). Puestu qu'ha síu a ella a la cuala oyía quejalsi, u jechalsi alabancias, u mesmamenti avedis callalsi. Puestu qu'es la mi rosa.
Y golvió p'andi el zorru.
-Vai con Diós, -iju...
-Vai con Diós, -iju el zorru-. Velaquiii el mi secretu. Es mu simpli: Namas se puéi vel bien con el corazón. Lo esencial es envisibli pa los ojus.
-La esencial es envisibli pa los ojus, -repitió el prencipiun, p'alcordalsi.
-Es el tiempu qu?has perdíu con la tu rosa la que la jadi a la tu rosa tan emportanti.
-Es el tiempu qu?hei perdíu con la mi rosa... -iju el prencipinu p'alcordalsi.
-Los jombris s'han olviáu d'esta verdá, -iju el zorru~. Tu nu debis olviala. Te se quea responsabli pa siempri de to lu qu?haigas domesticáu. Tú eris responsabli de la tu rosa...
-Yo soi responsabli de la mi rosa... -repitió el prencipina p'alcordalsi
05/05/2006
Amus a endingal un poquinu 'e vocabulario de comu palran o comu son los cantaris 'e los animalis, é idil los sonius que emitin y comu se huchean n'ehtremeñu.
L"abeja: Zumbíu; zumbeal.
Jacu: Jijeu; Jijeal.
Vaca, toru: Bramíu; bramal.
Burru: Rohníu; rohnal.
Bastardu: Silbiu; silbal.
Gorrinu, Cochinu, Puercu etc etc: Gruñíus, gruñil.
Cabra: Berríu; Berrial.
Conehu:Chiíu; chial.
Cibueña: Claquíu; claqueal.
Gatu: miíu; mial.
Cucu: Cuquéu; cuqueal.
Gallina: Caraqueu; croqueal o caraqueal.
Gallu: Quiquiriqueu; quiquiriqueal.
Oveja: Berríu; berreal.
Grillu: Grigueu; grigueal.Jabalin: Gruñiu; gruñil.
Lobu y perru: Agullíus; agullal.
Rana: Croíu; croal.
Paloma: Arrullíu; arruallal.
Finfanus y moscas: Zumbíu, Zumbal.
Patu: cuáqueu; cuaqueal.
Pardal, canariu, jilgueru etc: Piíu; pial.
Ratón: Chiíu, chial.
Gurulla: Buyíu; buyeal.
Archivo
| Quieres crear un Blog aquí
Sitio desarrollado, diseñado y gestionado 100% con Software libre: GNU/linux, GIMP, PHP, MYSQL, APACHE, ...
