Santibañez el Alto
31/10/2006
La chiquitía, La calbochá y el Halloween.
Dendi hadi unus añus acá s’á escomienzau a celebral Halloween, hadiendusi haranas polas nochis en discotecas y baris, engalandusi to con la parafernalia típica, lus dagalinis enuas escuelas deprendin el sinificau la harana y ya nu sabin si es muestra u emportá.
Paici mentira que prefiramus lu ahenu y nu tengamus apreciu a lu muestru y mas bien mus avehini; nu hadi farta dilsi a lus Estaus Uñius ni a Engalaterra pa landeal una harana tipica estus dias y amas pocu deferenti a comu mus l’an metiu polus ohus.
Ena Sierra ‘e Gata, es costumbri d’antañu el celebralsi la Chiquitia. La chiquitía se hadi hoy, el día previu al dia de tos lus santus. Consisti en que lus dagalinus y tamién lus mozus van polas casas piyendu la chiquitía qu’antañu era una graná, un membrillu, castañas, nuecis, higus, miel e incrusu a lus mas mozus un poquinu aguardienti o vinu. Al dil a piil la chiquitía se cantaba “Tía tía ami la chiquitía que si no, nu eris la mi tía”. Las peñas lus dagalis asina reunin pa hadel al día siguienti una merienda nel campu. Asina en llegandu el día lus santus lus dagalis aballan en corroblas a lus montis, o a lus regatus a meriendilleal lus avíus que tienin arrecohius el día anteriol, es idil la chiquitía.
El día de tos lus santus es costumbri dilsi al campu a merendilleal y hadel la calbocha. La calbochá tamién hucheá magostu. El magostu o calbocha se hadi nu sólu n’Estremáura, dendi Asturias, Galicia y el Pais Liones asin comu n’algotrus lugaris mas. La calbocha consisti en hadel calbochis que nu son mas que las castañas asás. La calbochá polu tantu es el hechu de asal las castañas o calbochis. Nalgunus lugaris idin carbochá y carvochis. Pue idilsi qu’es la fiesta las castañas.
Las castaña tieni maña, el que la herea, l’arrepaña.
La calbochá es una harana traicional del ciclu d’ivielnu y en onol a las animas benditas. Asina se idi que cuandu las castañas se andan hadiendu nel calbocheru ya que se hadin sin rahalas sartan y chisporrotean, esi ruiu se idi que son las animas benditas quienis lu hadin.
En arrayandu nuviembri la henti va lus montis arrebuscu castañas, nu solu pal magostu tamien pa hadel lus socochonis o encrusu con tocinu, las castañas án siu emportantis ena alimentación la 'e la zona.
El magostu nu solu consisti en manducalsi lus calbochis, tamién se bebe y bien de vinu y aguardienti, el tamborileru toca la gaita y el tamboril pa que la henti se haga unus bailis.
A la nochi, al alobriqui, cuandu abanga el día, dalgunus hundean castañas a lu artu ihiendu que son pa las ánimas benditas, tamién andi s’á hechu el magostu se quean unus pocus calbochis pa las ánimas. Alúu cuandu ya las campanas la ilesia escomienza a hadel lus sus sonis la henti s’arrecohi ya enas sus casas pa rezal a lus sus difuntus, las campanas tocan cuasi que to la nochi a mou responsu lu que hadi qu’enus puebrus quei un ambienti mu d’arrecohimientu.
15/10/2006
Villasgüenas de Gata se pue idil que s’alcuentra nel mesmu centru la Sierra ‘e Gata, linda con Santibañiz, Gata, La Torri, Acebu, Peralis del Puertu y Moraleha. Esta rodea polus regatus de las Vegas, el de la Hesa y el Helechosu que van al ríu Gata. Villasgüena tamién se conodi comu la de las sieti villas, sigun paici huerun las vedis que tuvun que levantala ebiu a las continuas runchas ena épuca la reconquista.
La vehetación y el clima son lus típicus de to la sierra.
La vegetación es la tipica la sierra con castañus, robris, alcornoquis y encinas huntu con berezu, haras, madroñus. Tieni unus 500 vedinus nel ivielnu anque nel vranu comu cuasi que to lus pueblus se duplica. En Villasgüenas alcontramus tamién olivaris y parralis basi la economia huntu al ganau, vacas, cabras, ovehas y gorrinus.
La clima comu’n to la sierra es mediterraneu contineltal temprau, la temperatura meyia es de 15ºC, lus ivielnus suelin sel suavis y el vranu secu con temperaturas meyas de 25ºC y másimas de 37ºC. Las lluvias anualis superan lus 1.000 mm de meya, indici elevau, solu comparau con rehinonis del norti la peninsula.
La ilesia de “Nuestra Señora de la Consolación” es unu de los tesorus destacabris y anque s’á diu remozandu el su orihin es del sigru XVI, anque la capilla seya del XIX y tenga añaius del sigru XVII . Algotra curiosiá pa guipal es la casa la muhel panzua. Esta es una casa palaciega del sigru XVII y se huchea asina ebiu a un relievi d’una muhel encorapatá. Dalgunus idin qu’es simbulu ‘e lus prostibulus antigus y algotrus que pue sel un simbulu de fertiliá. Esta casa nu sólu tienin la curiosiá de la muhel panzua, puen guipalsi ena su facha un gallu y una dorra y nuna esquina un ombri conus sus atributus masculinus bien definius.
Hay tamién algotras casinas dinas de vel, d’aspeutu nobli conus escus eráldicus enas fachas y puertas con horma ohival.
El día 27 ‘e huliu se hadin las peronias en onol al patron San Pantaleón y se hadin vaquillas ena praza y güena harana en heneral.
Comu ocurri mu amenu cona muestra estoria nu tenemus datus o restus arqueolohicus o nu s’an queriu estuyal. La zona de siguru estuvu pobla pol lusitanus y vetonis pa alúu venil lus romanus y acontinal la estoria cona reconquista y la estoria moelna.
De lus restus alcuentraus en Villasgüenas unu emportanti es el castru amurallau de “el Castillehu”, cuasi siguru veton. El castillehu esta situau sobri un cerru y andi recula el embalsi Rivera ‘e Gata o comu idin en Villasgüenas del Diablu, qu’es comu almientan a esa zona. Tamién puen alcuentralsi zahurdonis, en siendu el mehol conselvau el que esta nel camunu viehu pa dil a Gata.
Villasgüenas de Gata esta relaciona cona reconquista, comu abondu puebrinus de la sierra y el su orihin moelnu ebi sel entri lus añus 1157 y 1188, anque nu se tenga constancia. La primel referencia describía de Villasgüenas se hadi nel 1212, andi se idi que hué doná al autual Santibañiz, antañu San Huan de Máscoras o Masculles ya qu’esta tenia encomienda pol sel praza defensiva huntu con Gata, Hernanperi, La Torri, Cadahalsu etc Nesa fecha pasa a dependel economica, alministrativa y huicialmentri a la Ordin del Pereyro, que asocia cona Ordin de Calatrava en 1218 s’estableci n’Alcantara muandu el su nombri pol Ordin d’Alcantara.
En 1256 en siendu maestri la Ordin d’Alcantara don Frey Garcia Fernandi s’agracio a Villasgüena con un fueru especificu. Se trataba d’un fueru brevi que regulaba las relacionis lus vedinus cona ordin. Un hué un fueru realengu sinu unu otrogau pola propia ordinque tenia pueris pa hadelu dadus pol el Rey. Asina nel fueru vieni regulau el pagu el diehmu a la ordin, drechus sobri’l molinu y lu mas emportanti la necesiá de ayua milital a lus freyris de la ordin en casu de sel atacaus.
D’aquella épuca ay recohias divelsas runchas de Villasgüena conus puebrus limitrofis pol mé las tierras y lus pastus y en cuasi que toas es a la escontra Santibañiz a la encomienda a la que pertenecia Villasgüena. Asina el 10 de heneru de 1488 el arcaldi de Plasencia Huan Gutierri sentencia al favol de Villasgüena sobri Santibañiz, Gata y la Torri sobri la runcha pola hesa del Ehiu; en 1450 otra vedi a la escontra Santibañiz, Gata y la Torri pol pastu de la Aliseda, en 1489 otra vedi mas Santibañiz, La Torri, Gata enfrentás con Villasgüena pol pastu de la Reina. Las relacionis con Santibañiz paecin que nu huerun mu amistosas y asina en 1492 s’abri otru pleitu a Santibañiz pol mé el cobru el diehmu.
Un se pue pasal pol Villasgüena sin abel diu al Bañu la Cochina. Sigún relata la leyenda un pastol vió comu una cochina con reuma al metelsi de continu nel charcu, curó milagrosamenti. El baño la cochina un es un balneariu, na mas lehus, si esta preparau pa dalsi un bañu nel lou verdi y anque a la primel guipá pue parecel pocu ihiénicu, es ciertu que salis mu limpiu. Las sus propieais son pa lus doloris reumáticus y problemas de la piel, y sigún idin ties que hadel el tratamientu un númiru impal de vedis comu mínimu tres y consisti en embaurnalti nel lou y ehal que se sequi pa alúu limpialti, y pa qu’el tratamientu seya mehol dal un traguinu al pozu qu’ay al lainu con el augua curativa.
El apou de lus villahuenerus es el de zahinus y sigún idi el cantal: Zahinus villahuenerus, seis de mala condición, chambiaistis la vodi’l cristu, pola jesa del Rincón. Paici qu’antañu se hidu el chanci de la campana pola hesa con Peralis.
09/10/2006
Hoyus situau nel coradon la Sierra ‘e Gata, a 510 m d’altitu s’alcuentra sostribau a lus pies el monti Molcalvu de 1.055 m. En mitá un valli acomuelgau ‘e manantialis que hadin qu’en Hoyus aiga cantiá ‘e huentis comu la de San Lorenzu, la huenti’l Hondon del lugal, la huenti’l Cosu, las Dos huentis la praza la Capilla.
Hadiendu encahi bolillus ena praza. Típicu nu sólu de Acebu.
Hoyus nu es la mas populosa las pobracionis peru se pue idil qu’es la capital la Sierra ‘e Gata ya que pa hadel cualisquiel papeleu tantu de hulgau, notariu, rehistru, o al INEM, tamién tieni entri algotras cosas correus, centru salú, hormación profesional, Guardia Civil, Guarda forestal, elipueltu, gabineti sicopedagohicu del MEC etc y dendi 1840 es la caeza ‘el partiu la comarca.
El su terrenu e d’apenas 1500 etárias y vivin unus 1100 abitantis hadi que las sus callis esten en mu güen estau y conselvas, manteniendu la su estetica serrana. Se puen vel casas tipicas, palacius polas sus callis empedrás y abondu escús de lus sigrus XV y XVI. Nel lugal diban a pasal lus vranus lus obispus y familias puyentis d’antañu y vvelei lus escús que se puen guipal polas fachas las casas.
Hoyus linda con Acebu pal norti nel regatu la Barquera, con Trevehu nel oesti y Peralis pal sul.
El pueblinu esta rodeau de güertus con naranhus y limonerus y anque paeza mentira se puen vel secuoyas y guayabus, ya qu’el clima meyiterráneu continetal temprau hadi que puean dalsi, anque nu seyan autotonas. La temperatura anual meya comu’n cuasi que to la sierra ronda lus 14º C y el su paisahi esta prencipalmenti compuestu pol robrealis, alcornoquis, castañus huntu comu no a lus olivaris y parralis.
Comu cuasi que to lus pueblus ‘e la Sierra ‘e Gata el su orihin (anque pue que seya anteriol polus restus alcuentraus ) se situa ena reconquista del Reinu ‘e Lión.
La ilesia y la su facha tieni restus romanus y paleocristianus, hué restaurá ena reconquista de 1166 pol Fernandu II que la entriega pa la ordin del Templi, se pierdi en 1174 y s’arrecupera de nuevu en 1179. La torri la ilesia se poni entri’l 1606 y 1616 y en 1624 el Obispu Don Herónimu Ruiz de Camargu bendici la campana mayol bautizándula con el nombri de Santa Maria. Puen velsi dos ñius de cibueñas nel vranu en tol picorru, danduli un airi mas serranu si cabi. Nel 1723 se coloca un nuevu retablu ena ilesia cona imahin del Buen Varón y el viehu se eha ena ermita San Lorenzu.
Ena guerra la endependencia lus francesis que hidierun lu suyu pa la sierra comu efaratal el castillu ‘e Trevehu tambien se hidun cargu achacinandu al obispu ‘e Coria Huan Alvarí de Castru nel 1809 ena su casa de Hoyus.
El centru’l cascu estóricu s’alcuentra alreol la ilesia de Muestra siñora del Buen Varón que la rodean tres prazas, la Praza la Costitución, la Praza Mayol y la de Gabriel y Galán o el Cosu, antañu praza ‘e torus.
Haranas se hadin varias comun cuasi to lus pueblus, las prencipalis son las dedicás al su patrón San Lorenzu, el 10 y 11 ‘e agostu, la Romeria al Carrascal el tercel domingu ‘e mayu, la feria ganaera el 15 ‘e huniu, San Linu el 23 de setiembri, asin comu lus antruehus, la selmana santa, san Huan ...
En Hoyus se pue manducal dendi’l condumbiu tipicu la zona despricau n’algotru post asta comia Italiana supilelaborá con toquis serranus y to. Y comu no to regau conel vinu la sierra.
Archivo
| Quieres crear un Blog aquí
Sitio desarrollado, diseñado y gestionado 100% con Software libre: GNU/linux, GIMP, PHP, MYSQL, APACHE, ...
