Santibañez el Alto
23/11/2006
Oy quieru hadel de voceru del FRELIMPIU, es idil el “Frenti pa la liberación e Independencia del Imperiu Piornalegu” y voy a endilgal l’estatutu que se pue alcuentral en la pahína www.piornal.net la cual vus recomiendu.
Anque vus endilgui argu que pue sel considerau comu graciosu ena pahina se puen guipal abondu cosinas sobri el Harramplas, estorias, las ceredas del valli ‘el Herti, forklori, asina comu un apaltau sobri la palra que tieni un izionariu estremeñu castellanu nu comu lus que suelin atopalsi pola redi que son castellanu estremeñu. Es una pahina mu compreta y perpulía ena que se pue pasal mu güenus ratus leyendu y asina conocel argu mas de la muestra tierra, esta gran esconucía Estremáura.
Estatutu de Independencia del Imperiu de Piornal
Preámbulu
Piornal, jadiendu usu de los derechus que le reconocin la Costitución Española y el Estatutu d’autonomía de Extremaúra, jadi patenti su voluntá de constituilsi en Imperiu Independienti los mesis de febreru y marzu de los añus paris y los mesis de octubri y diciembri de los añus imparis, asina comu tós los diecinuevis y ventis de enero, Jarramplas, y quinci y dieciséis d’agostu, San Roqui Benditu y la Virgin de la Conceción, con sus vísperas respectivas dendi el toqui de Regociju.
En esta hora solemni en que Piornal recupera su libertá, la que perdimos más o menus cuandu vinierun los romanus y escachimondarun a Viriatu y dejamus de sel una tribu independienti, rendimus homenaji a tós los hombris y mujeris que lo han jechu posibri, especialmenti a los que estuvierun en la cárcil por correl a matacanazus a los de Navalconceju cuandu el deslindi, a metá del siglu antipasau.
Artículu 1
Piornal es un imperiu, o por lo menus lo vali. Y si no vali un imperio, vali un Potosí. Si Piornal es un imperiu, Extremaúra es un imperiu de imperius y España… ¿qué cojonis es España? La corona del imperiu recaerá cá añu en el piornalegu que tenga güevus pa jadel de Jarramplas peru sin armaúra ni suspensoriu, comu se jadía antaño: ¡a vel si sos creéis que cualquiera va a podel sel emperaol por su cara bonita. Bastanti que no se exigi ni el Graduáu de la ESO!.
Artículu 2
El Imperio Piornalegu está compuestu por los territorius actualis más los que se reclaman por razonis históricas comu en justicia son: El cabreru y el Barráu, la metá de las juridicionis de Navalconceju y Garganta lindantis con Piornal, la calli de la Estación de Autobusis y el manicomiu de Plasencia, toas las fincas de La Vera de lo comunmenti conocíu comu “La Tierra Prometida” y las que se comprin al día de mañana cuandu quitin las susvencionis al cultivu del tabaco, y el 24-3º Izda. Del Carré Ramón Muntaner de Santa Coloma de Gramanet dondi vivi mi tía tia Engracia, que la jadi mucha ilusión (estu habrá que negociarlu con Maragal y Rovira, aunque no se crei que jaya poblemas, a cambiu de un reconocimiento mutuu de los respestivus entis territorialis).
Artículu 3
Escudu: El escudu de Piornal estará compuestu por un avichuchi rampanti aparramplau en un tocón de berezu, sobre fondu de un cercáu de verdolagas con cuatru chivarras en las esquinas.
Artículu 4
Himnu: El himnu de Piornal es aquel que dici "Una vieja lavandu en el Molinillu, en el chchiricondiu la picó un grillu. La picó un grillu niña y eso sería porque tenía abierta la sacristía". Peru si no hay acueldu, habrá que recaval el parecel acreditau del prestigiosu folklorista El Pijoteru.
Artículu 5
Alza la pata que te la jincu.
Artículu 6
Sarán ciudadanus de Piornal tós aquellus nacíus en el imperiu de Piornal, los hijus y descendientis de los piornalegus que andan p’ahí por esus mundus, si sabin cantar la torera, y tos aquellus que lo solicitin, esu sí, a sana fe. Pa aumental la población, la garganta de La Luz y de la Desesperá serán declarás navegablis, y los ríus Jerti, Tiétar, Alagón y Taju aguas internacionalis pa que puan venil las pateras cargás de preditus, a los que se les otorgará la nacionalidá si en el plazu de una campaña aprendin a cogel cerezas comu es debíu, si no se les manda a tomal pol culu por dondi han veníu, a cuyu fin se recabará el asesoramientu y colaboración del reinu de Marruecus, por el salariu mínimu interprofesional de cuandu campaba por estus pagus la Serrana de la Vera, que naturalmenti y en contra de lo que digan los garganteñus era de Piornal porque lo decimus nosotrus y no hay más que hablar. ¿a santu de qué, si no, se iba a habel jechu el chozu al lau de Olivamartín sin que la llevara el guarda de la dehesa al corral de conceju comu se jadía antaño con toas las vestias forasteras que se metían en la juridición?)
Artículu 7
Lengua. La lengua oficial del imperiu es el piornalegu castúu. To piornalegu tiene el derechu y el debel de conocel su lengua. Las institucionis imperialis promoverán su usu y serán especialmenti escrupulosas de que en dicha lengua vengan traducíus los billetis de bancu, los prospestus de las boticas, los enceraus de los baris dondi se escribin las racionis y los pinchus y los tikis y valis de descuentu de Sediacu y Udacu, y las etiquetas de los produstus de La Flor Piornalega.
Tamién se sustitularán las penículas de la televisión. Se conminará al señor Mister Bily Gueit a que traduzca al piornalegu tós los pogramas de microsof y se creará un sistema operativu propiu llamau “Piornalinus2014” (pa que no se quee añeju en dos días). Los que no sepan hablar la lengua del imperiu irán a la escuela de los cagonis tós los martis y juevis después de comel, en vez de echalsi la siesta o vel la novela, pa que se motivin comu es debíu y la aprendan a escapi, dondi se la enseñarán los ereditus de reconocíu prestigiu por las universidadis del imperiu de imperius, comu son tio Nicéforu (cuandu no esté en Leganés con la su muchacha) o tia Leocricia (cuandu no esté en Sabadel con la suya).
Artículu 8
En el procesu de normalización lingüística se eliminará la “h” y se sustituirá por otra letra que no será ni “h” muda ni “j” aragonesa” sino algu intermediu que se llamará “jota piornalega” pa podel decil comu es debíu “jhacha, jhigu y jhiguera”. La Jota Piornalega, además de podelsi pronuncial se podrá cantal y bailal. Pa ponel en claru toas estas cosas se nombrará presidenti de la Imperial Academia de la Lengua a Marcelu Carneru Mochu, revolucionariu filólogu, más conocíu jadi tiempu en los forus de Internés comu MCM (aunque jadi muchu que no ha vueltu a revullir, el joíu. No sabemos si es que le han confiscáu el ordenaol la Consejería de Educación por subversivu).
Artículu 9
Piornal tendrá dos banderas por lo menus: de quita y pon. Será de color blancu o de lienzu morenu. A ca ciudadanu se le darán unas gafas de mercaíllu del color que él quiera según su filiación política o inclinación sexual y asina tos contentus pues es bien sabíu que “tó se ve del color del cristal con que se mira”.
Títulu Primeru
Artículu 1
Financiación: El tesoru imperial será sufragáu por el 128’5 % de lo recaudáu por el IRPF. Por el importi íntegru de lo recaudau por el IVA, si es que sigui habiendo alguien que lo pagui. Por la tercera parti del montanti del sobranti de la parti contratanti (si no lo entendéis, dejálselu pa los políticus comu se jadi hasta ahora con tó lo que no se entiendi, o habel estudiáu o habel vistu las penículas de los Hermanus Marx. Pa los que no habéis estudiau, un avisu: “El capital” no es una penícula de los Hermanus Marx, sino un libru que escribió un primu suyu por parti de madri).
La Iglesia contribuirá a sufragal los gastus del Imperiu con el montante íntegru de lo recaudau en las procesiones por metel a los santus a la iglesia por “el brazu izquierdu d’alanti”. Pa compensal a ambas dos partis, se adquirirán estatuas de San Mauricio y la Legión Tebana (una de ca santu legionariu, no de grupu), y otra de ca unu de los Santus Inocentis y otra de ca una de las 700 vírginis o al menus de las que presentin certificáu ginecológicu, y habrá procesión tós los días, por la mañana y por la tardi.
El Imperiu de Piornal seguirá recibiendu los fondus que le correspondan del Imperio de imperius de Extremaúra , del Imperiu de imperius de imperius de España, y de la Comunidad Europea más que ná pa que no se crean que nos queremos desapaltal del tó y nos jagan el boicot a las ceredas o algu.
Artículu 2
Organización territorial: Pa reconocel tos los jechus diferencialis habías y por habel, el imperiu de Piornal se articulará en cuatro comunidadis autónomas: El Pocillu, Las Seras (estas dos, “comunidadis históricas”), El Barrau y El Cabreru (estas otras dos, “comunidades histéricas”.
No es por faltar, sino por el cabreu que se van a cogel cuandu no les quedi más remediu que unilsi al imperiu de Piornal, porque ellus tamién quierin sel imperius independientis, y no es por ná, peru si los dejamus, de aquí a cuatru días están pidiendo la independencia los de Angomis, y esu no pué sel), ca unu con su estatutu correspondienti.
Ca comunidad autónoma se dividirá en las provincias que sea menestel pa que tós los paraus del imperiu puan trabajal de funcionarius. La capital del Imperiu de Piornal es Piornal capital propiamente dichu, aunque a los del Cabreru y a los del Barrau no les asienti mu bien. Pa compensallus, propondremus al Barrau pa sedi de las Olimpiás del 2056 y al Cabreru pa la Expo del 2108, centenariu y picu de la Proclamación de Independencia
Artículu 3
El parlamentu es la cámara de representación de tós los piornalegus. Pa evital gastus de elecionis y garantizal el ordin públicu, tós los habitantis del Imperiu serán parlamentarius, con voz, con votu y, lo más importanti, con sueldu. A los del Barrau y a los del Cabreru se les pagarán dietas (si comin dondi los Truenas. Si se train la merendilla de casa no) y desplazamientus pa que no digan que ellus son menus.
El parlamentu estará constituíu por un solu escañu, peru esu si, mu largu pa que se puea sental to el mundu, y reondu pa que to el mundu se puea arrimal al sol que más calienta en igualdad de condicionis.
Artículu 4
El Podel: El podel emana del pueblu, en concretu emana de la fuenti Encima y de la fuerti Los Praíllus. Si algún añu por la sequía estas fuentis no emanan, valdrá el podel de cualquiel fuenti que emani. El podel tamién emana de la familia, sobre tó de las primas emanas.
Artículu 5
Derechus y libertadis: A parti de los derechus que recogin toas las constitucionis del mundu mundial comu son el derechu al trabaju, a la vivienda, a la igualdad ante la ley y a la igualdad de oportunidadis… (no sos riáis, que estu es mu seriu), tós los habitantis del imperiu tienin derechu a fumal, inclusu tabacu, en cualquier lugar del mesmu, incluíu en las embajás y consuláus.
Se concederá asilu políticu isofactu a tós los perseguíus y acosáus por hacel usu de esti derechu en otrus puntus del imperiu de imperius de imperius de España, siempri que comprin el tabaco en el estancu de tia Felicísima, pa aumental el PIB. Pa garantizal los derechus de los no fumaoris, tós los baris, garitus y locales de altelni tienin que tenel a disposición de los clientis que lo solicitin caretas antigás, dotás de un bujeru chiquininu pa que se puan bebel la consumición con una pajina (de las de chupal)
Derechu a la sanidad: pa evital gastus supérflus, se prohibi a tós los habitantis del imperiu cogelsi alguna malotía de gravi los mesis y días que toca sel imperiu según el preámbulu. Se podrán ponel malus el restu del añu, que es mu largu, y seguil bajandu a la Residencia de Plasencia comu hasta ahora.
Libertad religiosa:
El imperiu de Piornal será aconfesional: el que quiera que se confiesi y el que no, que no se confiesi. Peru se tendrá especial miramientu con la religión Católica/Apostólica/Romana, que comu to el mundu sabi es la única y verdadera. Estu no quieri decil que las demás religionis no sean las únicas y verdaderas, que lo son, aunque no tantu comu la religión Católica/Apostólica/Romana.
De acuerdu con lo antedichu, se harán gestionis anti el Vaticanu pa que el cura de Piornal sea nombráu cardenal primáu del imperiu, y los curas del Barráu y del Cabreru, respestivamenti, arzobispu y vicariu general castrensi, pa que no les dé ansia, que la envidia es mu mala. La iglesia de Piornal se reformará y ampliará pa hacel una catedral dondi quepan tos los santus que se van a adquiril pa las procesionis según lo susodichu en el artículu 1 de este mesmu títulu. Si la catedral no cabi en el solar de la actual iglesia, se harán gestionis con los acionistas de la Sierra pa jadella en los Regajonis.
La enseñanza de la religión es libri: el que quiera y la que quiera la estudia y el que no o la que no, no. Peru tós los muchachinus y muchachinas que no quieran dal catecismo y catecisma, a la hora de Religión, pa tenellus y tenellas entreteníus y entretenías y que no den calda a los maestrus y a las maestras, darán peonás de villa en la construcción de la susodicha o susodichu catedral o catedrala.
Por cieltu: tós los habitantis del imperiu, sean tíus o tías, tienen derechu a decil y escribil las cosas comu siempri se han dichu cuandu se entiendi claramenti, aunqui se cabreen las feministas, y no tó en masculinu y en femeninu a la vez comu jadi el lendacari del imperiu de Euskadi, no por descriminal a naidi, sinu porque comu habréis comprobáu, estu es mu cansinu de leel y de escribil.
Artículu 6
Deberis: El debel más importanti de cualquier habitanti del imperiu es no tocal los cojonnis a sus semejantis, a no sel que estus se lo pidan expresamenti. Hay que andal con cuidiau si un semejanti le dici a otru semejanti: “¡tócame los güevus!”. En esi casu, el semejanti segundu se tieni que celcioral de que el semejanti primeru no se lo dici con rintintín.
El serviciu militar será obligatoriu por varias razonis: lo primeru, pa justifical el cargu de vicariu general castrensi porque si no dirán los del Cabreru, con toa la razón, que vaya embajá y que ¿pa qué queremos un vicariu general castrensi sin serviciu milital?.
Lo segundu, por si se ponin farrucus los de Navalconceju y los de Garganta pa devolver de buenas maneras los territorios usurpáus y decimus nosotrus que alguién tendrá que garantizal la integridad territorial pa que no pasi lo de antaño, que si habiera habíu ejélcitu piornalegu o por lo menus somatenis otru gallu nos cantara .
Lo terceru, porque, ya que se siguin jadiendu las fiestas de los quintus, que estus jagan algu de provechu y no solu pintarrajeal las parecis, pedil el chorizu y acarreal los nabus con la ratona por Jarramplas.
Artículu 7
La unidad de cuentas del Imperiu de Piornal es la “pizca”. Ca pizca se dividi en 10 “pizquinas”. Ca pizquina en 10 “pizquininas” y ca pizquinina en 10 “pizquirrininas” (a vel si cundin más que los eurus)
Indisposición transitoria:
Esti proyestu de estatutu de independencia está abieltu a toas las aportacionis que quieran jadel otras asociacionis y colectivus comu puén sel las peñas y corroblas siempri que no menoscabin nuestras legítimas aspiracionis y ningunu de sus miembrus esté tomandu sustancias dopantis o sicotrópicas.
A vel si tenemus la suerti de que venga por aquí algún políticu de la Junta un pocu mamáu y, en un momentu de ofuscación, que tó podría ocurril, diga que esti estatutu se va a aprobal en Mérida talmenti comu salga del parlamentu de Piornal.
Firmáu: Esti que lo es, El FRELIMPIO
“Frente pa la Liberación del Imperio Piornalegu”
To estu y abondu cosas mas en www.piornal.net
12/11/2006
Las presonas escapacis d’usal dos palras nu solu posein competencias en dambas dos, tamién tienin atituis presonalis anti ellas y anti las sus posibiliais d’usalas; atituis que risurtan de la su estoria presonal que l’ án hechu adotal una comu la su palra prencipal y pol algotru lau razonis estralingüísticas ralacionás conel papel social que pretendi ocupal ena socieá de la que horma parti o sistema ‘e valoris pol que se rihi el su compoltamientu.
Weinreich, huchea lealtá lingüística a la atitú positiva anti una palra. La lealtá lingüística tieni un dobri sentiu, se pue entendel pol ella el ahinaeru pol mantela libri d’enterferencias lingüísticas de la palra vedina y tamién pol l’efuerzu d’usala en toas las situacionis posibris. Estu unicamenti pue hadelsi cuandu se tieni una concencia lingüística que hadi que se puea sentil comu’n valol la correción de la palra dalcuerdu con detelminá nolmas lésicas y sintáticas. Cosa que n’estremáura andamus mu largu entovía y tenemus simprementi que contentalmus de nu orvialmus de comu se almienta tal o cuala cosina.
La atitú s’usal siempri que seya posibri la palra minorizá que queremus muestra tamién tieni conotacionis socialis, nel muestru chascu de diglosia y cona palra a puntu esaparecel y con un valol social minimu, el su usu es una horma ‘e conselvadurismu.
Dalgunas criticas a la mi horma de describil y de comu lu hadin algotrus bragaus amantis l’estremeñu, ihiendu que nunca tien sentiu idilu asina o asinu tal o cuala horma, nu es mas qu’un conselvadurismu farsu que se sostriba ena resistencia y estu ná mas que mus fruhi a la muerti la palra. Esta craru que las palras son argu vivu que muan conel tiempu y chamban sigun lus palrantis la usan, peru cuandu nu se quieri muala en dengun sentiu, nu le quea mas que quealsi ena morrala dalgun campusinu pa mental las sus herramientas. Pol suelti estu nu aconteci siempri y dalgunas presonas entiendin que pa que la palra acontinue y enceti de nuevu a andal polas callis tieni que muelnizalsi y acetal nuevus telminus y sabel que nu siempri ena recuperancia del prestihiu y el usu duna palra nu siempri la fideliá lingüística tieni que dil uniu a la fideliá a la nolma lingüística, pa esu eberiamus tenel la mesma considerancia y prestihiu en dambas palras y estu nu es asina en cuantu que entovía ay presonas que niegan l’esistencia l’estremeñu.
Algotrus simprementi mas que fideliá lingüística nu tienin enconvenienti dengunu en lu que puei huchealsi endeferencia lingüística, odiu, avehinación anti la palra minoritaria frenti a la maoriatria, y estu n’estremáura anque me pesi, es mu tipicu.
11/11/2006
La diglosia del griegu ????????? “ de dos luenguas, se proudi cuandu dos palras convivin nuna mesma pobración andi una tieni un estatus previlihiau comu palra ‘e cultura y prestihiu o usiu ofizial, frenti algotra qu’esta arrepartá a las situacionis enferioris, a la vía familial, folklori o simprementi a la oraliá ‘e la vía comun y privá.
Se prouci diglosia cuandu la palra dominá es mayoritaria enas presonas con menus puel y prestihiu ena socieá, mentras que l’algotra palra es propia’l grupu o crasi dominanti, asin comu de l’ alministración.
Las presonas de la crasi inferiol puein o bien acatal que las palras tienin huncionis deferentis o usalas sigún el momentu, o puedin y cuasi siempri es asina, encetal un procesu ‘e naturalidación pa la palra dominanti, hidiendu su usiu en cuasi que toas las situacionis y hidiendu emplegu ‘e la palra dominá en momentus opoltunus y detelminaus. Nestas situacionis, la trasmisión enterheneracional de la palra dominá siempri es abondu efariciosu, enteosu y enrrevesinau, queandu palrantis a ca heneración.
Se proudi un conflitu lingüísticu cá vedi que lus palrantis dela palra dominá quierin comunicalsi ahuera lus límitis empuestus a la palra y hadel usiu nolmalidau della pa qu’esta puea ocupal el lugal la dominanti.
Altoncis; estu es lu que pasa enus muestrus puebrus cuandu se va palrandu ena palra de siempri y hadin mofa en cualisquiel lugal, pasa cuandu lus muestrus güelus mus palran y de seguia les retayemus idiendu qu’esu un se idi asina qu’es asau, cuandu el dagalinu o dagalina s’avehina e’ la su mairi pol gañitali ena calli elantri lus sus collacius ihienduli “corri an cá la tia”, ”vaiti an cata el tu pairi”, o “venti qu’el condumbiu esta ena mesa”..... y cuandu usamos telminus unicamenti entendius y propius n’estremáura sin sabel que nu tien ná que vel col castellanu, pues qu’abondu henti nu sabi retruqueal ni sabi el pol qué idi semehanti parabra y quemaus comu cutaus ihiendu ná mas que pal muestru lugal almientamus asina a tal o tala cosina.
Queremus queal nel orviu la palra, mus avehinamus della, queremus arrecuperala, ay palras mehoris qu’algotras, semus coscientis la riqueza que tenemus entovía y aun y tó mus refala , semus diglosicus o puebrerinus .....
05/11/2006
Estus urtimus dias andu alunau y la puesia "El tíu Buju" de Juan José Camisón me vieni mu bien pa relatal el mi estau.
MARABAJAS
Juan José Camisón
1. MARABAJAS
EL TÍU BUJU
Pos a mí m’aconteci de nochi
lo que sólu le pasa a los cárabus:
¡Me se ponin los ojus reondus
y m’ajuyi to’l sueñu pitandu!
Me barruntu com’un jolmiguillu
que no puéu ni siquiá estal sentáu
y me entra un ajogu en el cuerpu
y unas ganas de dilmi a argún láu...
...Pa la jesa a correl los cordelis,
o pa’l monti, pa ausal-li a los canchus,
o a escuchal con la luna esus ruíus
que s’escuchan pa’n vera ‘e los charcus...
...Y es qu,’en viendu venil qu’anocheci,
me se güervi to’l cuerpu azogáu,
me s’enllenan las venas de juerza
y m’ajuyin tos esus nubráus
que de día la chinostra m’atontan
y me dejan cuasi abombilláu.
¡Tie que sel qu’estoy malu pol juerza
o sino es qu’andu mediu embrujáu!
Ni me tumba el sorongu a las nuevi,
ni a las dies o a las onci m’apranu:
pa que yo ya, cansinu, m’ajongui
tien que sel pol lo menus las cuatru.
Mentris tantu no paru un minutu:
m’espariju en la calli ca y cuandu,
vengu y voy de la cuadra a la estroji
o m’enréu a asestil los guarrapus,
sargu y entru d’ajuera p’adrentu,
miru el techu pa vel si hay morgañus...
Voy dispués, un candil en la manu,
pa la sala y remiru los cuadrus
con la cara y la crus de los Cristus
y los ojus torcíus de los Santus...
Coju aluegu y enjilu pa’l arca
pa miral si d’allí sacu argu:
cuatru rueas de sayas, tres múas,
un mandil y un sortún coloráu,
dos pendientis de pera y un jilu,
un chalecu con brochis doráus,
cincu librus de pellica 'e vaca,
la escritura ‘e la casa, un retratu
y un pesinu que siempri aquí estuvu
y que naidi ha sabíu nunca usal-lu...
...Me recorru más tardi vasaris,
alacenas, rebatis y almarius
y le miru los ramus y caras
que pintáus llevan jarras y pratus...
...Doy aluegu en abril los corralis,
voy a vel si la chota ha mamáu,
l’echu piensu a la potra y al mulu,
deju to ya asestíu y endonáu
y m’enréu en ordenal los aperus
pa dejal los avíus colocáus,
o me sientu en un ruscu mu grandi,
qu’en el mediu ‘el corral hay jincáu,
y me pongu a miral las estrellas
pa inventalmi aleluyas un ratu,
y me deju alumbral de la luna,
que no esisti farol más baratu...
¡Sólu asina me quéu amorráu!
Paeci entoncis que sientu un remansu
que m’enllena las patas de lana
y me poni cansinus los brazus,
dos bolindris de promu en los ojus
y los déus comu mediu borrachus;
me se jacin d’estopa los sesus
y hasta hay nochis que cuasi me caigu
del pedruscu pensandu en visionis
que m’atontan las sienis un tantu.
Peru, en na que me notu escurrilmi,
deseguía escarranchu los brazus
y, lo mesmu que si un rejileti
m’anduviesi el cogoti jurgandu,
pegu un brincu y, ¡mecachis en diela!,
me se va la morrera a otru láu.
¡Ya puéu dil ensartandu frejonis
o picánduli berza al guarrapu
o escuajandu cuartillas ‘e chícharis
o enristrandu cebollas y ajus,
porque d’éstas ya voy aviáu
cuandu menus d’aquí pa las cuatru,
y hasta velmi metíu en el catri
tú pon puntu que farta un güen ratu!
M’he de dil hasta el Valli ‘e las Burras
ondi está toa la genti trillandu
pa buscal un poquinu ‘e caraba
con argunu que no esté roncandu,
o alargalmi, atrochandu vereas,
en el burru montáu o a caballu,
cuandu menus pa cerca del Cáparra
o quiciás cuasi pa los Campazus.
Luegu ya sí, cansinu, me vengu,
mallugáu de los güesus y jartu
d’estiral-li del rabu a la nochi
y en la panza con un güen buracu,
y me metu pa casa a toa priesa,
un coscurru de pan rebuscandu
pa tapalmi el bujeru de jambri
que las tripas me va arreguñandu.
Sacu entoncis a escapi un chorizu
o me fritu un cachinu ‘e tasaju,
o m’enjilu un cuartillu de lechi,
o con vinu dos güevus me batu.
Sólu asina m’enroscu en la cama
y me quéu dormíu d’un sopapu.
¡Mira tú que yo deba pasal
pa dormilmi por esti carvariu!
http://telefonica.net/web2/juanjosecamison/marabajas1.htm
Archivo
| Quieres crear un Blog aquí
Sitio desarrollado, diseñado y gestionado 100% con Software libre: GNU/linux, GIMP, PHP, MYSQL, APACHE, ...
