Santibañez el Alto
17/12/2006
L’atiú lingüística es la atitú social que se le da a la luengua y al su usiu ena socieá, es idil, vieni a sel el mou en que las presonas hadin usiu e la luengua ena socieá, lu que se tie pensau sobri la mesma, el valol que se l’otolga, l’apreciu que se le tie ...
Las luenguas son escapacis e trasmitil sinificaus con conotacionis socialis, las luenguas trasmitin las normas y aspeutus curturalis, efinin al lus palrantis o grupus e palrantis de la mesma. Pol mé la palra se pue deferencial un grupu d’algotru, una crasi social d’algotra.
Las variais lingüísticas puendin sel enterpretás comu’n definiol de la entiá social y suelin sel lus grupus socialis mas prestihiosus lus que marcan las pautas e las atituis lingüísticas, y estu hadi que se valori mehol cualisquiel cosa proponiá pol grupu e prestihíu.
La atitíu lingüística se sostiba ena concencia sociolingüística, las presonas tienin concencia duna serie hechus socialis que les uñin, que les hadin sel puebru, socieá. Y asina cuandu la concencia social o de pretenencia sufri e continu esprestihiu la concencia lingüística sufri sobremaera hidiendu que la palra se apelli al sentil comu socieá o puebru esprestihiau.
La muación o conselvación duna palra tie’l su enceti enas atituis lus palrantis pa cona mesma; ay que tenel en consieración variabris comu l’apreciu o arregañu social asociau a la palra nuna socieá etelminá y la emportancia desa palra enus procesus d’uñía dun grupu social, la entificación del grupu cona palra o cunun grupu mas grandi que palra algotra luengua deferenti.
Asin enus chascus comu n’Estremaura andi lu emperanti y sinu e curtura era y entovía sigui siendu palral ensin acentu argunu y ententandu nu idil denguna las parabras que mus suenan a campusinus y en teniendu’l pobrema de nu sabela idil en castellanu normativu, lus palrantis minorizaus tienin una atitú negativa a la su propia palra ya qu’esta nu les premiti un ascensu social figurau ebiu a qu’el moelu social prestihiusu era y sigui siendu lu foriatu, el señoritingu finu que prenuncia rebien to las esis y palra castellanu con parabras que nu son propias l’estremeñu.
Una palra nu quea nel orviu pol mé que lus que nu la sabin nu la deprendin, sinu pol que lus que la sabin nu la palran.
10/12/2006
Andamus de noragüena lus amantis la muestra palra, l’Estremeñu. Landeandu pola redi alcuentré una páhina que nun escomienzu puyera paicel comu algotra cualisquiel mas qu’almientan Estremaura, acabihé nella pol nombri EstremaWeb, ihi amus a vel. Paici qu’entovía anda nel enceti, se pue idil qu’acabiha e tenel la su nacencia y ya prometi. Peru lu que verdaeramenti me llamo l’atención hué el proyeutu “Netu”
El proyeutu Netu comu idi l’autol ena páhina es una aniciativa d’EstremaWeb pa facilital a to lus enteresaus el deprendizahi l’estremeñu, totarmenti e bardi pol mé simprimenti dun ordenaol y una persona que vieni a sel comu’n tutol pa deprendel la palra y paici que ay material y to preparau pal asuntu.
Es una mu güena noticia qu’asperu tenga güenu resurtaus y aiga presonas enteresas. Es una opoltuniá pa tos aquellus que idin que les petaria sabel un poquinu d’estremeñu peru que nunca lu tienin sentiu ena su familia o nel su lugal, pa tos aquellus que sientan curiosiá, pa lus que nu sepan comu escribilu....
Tieni un apaltau e programas traucius a l’estremeñu qu’asperu creza pa puel apañal to lus que puea.
Pa apuntalsi al cursu y echal una guipaina a la páhina dil a http://personales.com/espana/badajoz/EstremaWeb/
Pola mi palti asperu que furruli y sarga palantri el proyeutu Netu.
04/12/2006
En Torrehoncillu, un pueblinu e Cazris entri algotras haranas se hadi la Encamisá. La fiesta esta dedicá a la Pura o la Pringona, qu’es asina comu huchean a la virhin pol coinciil conel eniciu el pringui o matancia, y daina vieni tamien el moti lus torrehoncillanus “pringonis”
Ena nochi el sieti e diciembri ya acabihá la novena a la virhin las campanas la igresia repiquetean y la praza mayol s’enllena e henti entri lus que están lus escupeterus que hadin sarvas a la virhin, a la Pringona. Mentras un grupu e ombris en hacu (lus encamisaus) van an cata el mayoldomu andi recibin el farol que fruhiran duranti to la harana. Lus encamisaus van hateaus con grandis y pulias sabanas a mou e capa que les cubri dendi la mollera. El mayoldomu tamién fruhi una sábana mu pulía bordá cona imahin la virhin arrodeá d’estrellas azulis.
http://www.caceresjoven.com/paginas/turismo/extremadura/fiestas.asp?cod=27
Eris Portera, eris María, eris la rosa d’Alehandría.
Patrona eris e toa España, rogal pol ella, Virhin sagrá.
Enbahu el tu mantu, mus cubrirás y a lus sordaus qu’en guerra estan.
Esta nochi y esti día, igamus tos ¡Avi María!
Nesti día y nesta nochi, cantal queremus el tu santu nombri.
Oliva verdi, paloma branca, eris qu’anuncias pas en el mundu.
Huenti pereni, podu e agua, andi la curpa nu tuvu entrá.
Tiéndi’l tu mantu, Patrona amá, qu’estás hormá sobri la guerra.
En tol tiempu tu mus amparas, peru ena muerti con mas costancía.
La procesión se hadi duranti dos oras y en ca lugal ardin hachas y horitañas ( capazus, hogueras, lumbris), se hadin salvas, canticus al pasu la corrobla qu’acabiha ena praza andi’l mayoldomu degüervi l’estandalti. Anque la procesión acabiha nesti momentu las sarvas y cuetis conduran ya que lus paladinis y encamisaus van an cá’l mayoldomu envitaus a bebel güen vinu y manducal coquillus.
www.plasenciaweb.com
Pa tol qu’andi enteresau, la Corrobla e Paladinis de Torrehoncillu, ofreci la posibiliá de guipal en diretu el sieti e diciembri a las 22:00h. lus momentus e mayol emoción y holgoriu, la entrá y salía l’estandarti la virhin, pa lu que tien estalá una cámara y dendi la web www.laencamisá.org se pue siguil y particiepal dendi tol mundu.
03/12/2006
De qué ependi qu’un bilingüi nuna situación detelminá usi una o algotra palra? Ependi basicamentri ‘e dos fatoris. Pol un lau estan lus que raican nel propiu endividiu, la su conocencia ‘e las palras y la su atitú frenti a ella, el su nivel d’endintificación con cá una dellas y el su deseu d’usalas. Y pol algotra palti estan lus fatoris socialis, las nolmas que regulan el usu duna o algotra enas deferentis situacionis pubricas y privás.
En cuasi que tos lus bilingüis se puedi identifical una regulariá nel usu duna u l’algotra palra, ya que las atituis propias sobri las palras son relativamentri establis asin comu las situacionis y las nolmas son tamién establis y repetitivas enas que se puedi usal una o algotra palra.
L’aquisición de dos palras nunca es diguala maera, nunca se consigui e la mesma maera ni el usiu es el mesmu, siempri tiendi’l preominiu duna frenti algotra, y esti predominiu se mantieni a lu largu la via. La mayoría lus bilingüís son escapacis de identifical la que consieran la su palra prencipal. La palra prencipal el bilingüi sedrá la palra que conodi mehol y la qu’usa mas amenú y en situacinis mas variás, ena que tieni mas arbeliá, anque nu siempri es asina y pue suceel que la palra mas usá pola presonay aquella cona que se sienti edentificá nu seya la que mehol conoza o que mas usi en ciertas cercustancias, qu’es lu que l’aconteci a quien palra una luengua minoritaria y que nu tieni estrución denguna sobri la mesma y es polu que anque la consieri comu la su palra prencipal nu puedi usala enus usius escritus o hormalis. Anque cuasi siempri la palra prencipal ena mayoría lus chascus es la palra ena que mantieni las relacionis presonalis mas prohundas.
Heneralmentri lus bilingüis nu muan la su palra prencipal y la mantienin comu tal a lu largu ‘e to la su via, aque muacionis emportantis nel contestu social y enas relacionis presonalis puein provocal un nuevu equilibriu entri las palras y encrusu chambal una pol algotra comu palra prencipal.
Ay presonas bilingüís que son encapadis de idil cual es la su palra prencipal , conodin prefetamentri las dos palras, tien ocasión d’usalas endeferentementi, es lu que se huchea bilingüísmu funcional, el tenel la posibiliá del usiu dambas palras pol igual tantu enus ambitus privaus comu pubricus.
Y que aconteci ena palra ‘e las barruntaeras... nel chascu lus bilingüís, en que palra barruntan?. Ena mayoría lus chascus se idi qu’usan dambas palras endestintamenti anque siempri paici qu’es una la que predomina sonbri algotra qu’es la que se pue consideral la prencipal. Un bilingüi qu’usi dambas palras y tenga la posibiliá e hadelo en deferentes ambitus, de siguru enas sus barruntaeras hadra lu mesmu.
Pue dalsi el chascu que nuna mesma familia la palra que se usi con dalgunus y algotrus seya deferenti, estu ocurri en chascus de diglosia y cuandu la palra minoritaria esta mu restrinhía. Pa detelminal el usiu duna u algotra palra ependin abondu variablis comu las relacionis presonalis, el labutu, las relacionis interpresonalis, la palra mayoritaria y pubrica etc.
Las presonas escapacis d’usal dos palras nu solu posein competencias en dambas dos, tamién tienin atituis presonalis anti ellas y anti las sus posibiliais d’usalas; atituis que risurtan de la su estoria presonal que l’ án hechu adotal una comu la su palra prencipal y pol algotru lau razonis estralingüísticas ralacionás conel papel social que pretendi ocupal ena socieá de la que horma parti o sistema ‘e valoris pol que se rihi el su compoltamientu.
Nu vus suena las parabras prenda, dagalinu, chirivehi y dalgunas mas que son mu carisiosas y henuinacaenti estremeñas. A vel si dalgunu s’alcuerda y endilga unuas cuantas parabras cariciosas tipicamenti estremeñas.
Archivo
| Quieres crear un Blog aquí
Sitio desarrollado, diseñado y gestionado 100% con Software libre: GNU/linux, GIMP, PHP, MYSQL, APACHE, ...
