Santibañez el Alto
06/02/2007
El fenúminu la desaparición de luenguas s’acelero duranti las urtimas decadas del sigru XX y paici que duranti'l prehenti sinu se toman meias urhentis mas de la mitá las luenguas palrás ena atualiá van a esaparecel .
Fishman, unu lus envestigaoris mas emportantis nel campu la sociolingüística, proponi un ordin que contempra ochu nivelis entri la perda y la recuperanza duna palra minoritaria.
El nivel 1: vieni a sel la plena recuperanza, con prehencia la palra en tolas ativiais en condicionis d’iguardá cona palra dominanti.
El niel 2: Desistin usius estitucionalis y tamién esta prehenti enus meyus e comunicación.
El nivel 3: La luengua es usá enas relacionis comercialis y nel labutu.
El nivel 4: La luengua es usá comu meyu de deprendizahi.
El nivel 5: Argun deprendizahi se da anque seya n’escuelas la comuniá.
El nivel 6: La moceá deprendi de lus sus pairis y la comuniá hadi usiu e la palra n’ativiais socialis. Esti sedria el límiti entri la posibiliá rial de la recupernza y l’enceti l’abaldonu.
El nivel 7: La moceá la deprendi, peru solu unus poquinus, o es usá en detelminás ocasionis.
El nivel 8: Nivel de masimu abaldonu e la palra, solu lus viehinus acontinuan palrandula y la moceá la tie abaldoná y nu la deprendin.
Estus nivelis puen valel pa sabel comu estamus nel muestru chascu conel estremeñu, peru tamién pue valel pa dali la güertay vel pandi puemus dil ena recuperanza.
Paici craru que nel chascu l’estremeñu mus alcuentramus enus urtimus estayus, entri’l sieti y el ochu. Ya nu la palran ná mas que lus viehinus lus lugaris y anque ya nu seya tala y comu huesi palrá antañu entovía se les pue sentil un estremeñu mu puliu y lus sus hihus ya lu que palran anda arrebuhau col castellanu, asinq ue la heneración siguienti ná mas que tie vocabulariu y hirus lingüísticus tipicus, peru nu se pue idil que seya un estayu la palra entermeyu sinu mas bien la perda irremediabli si nu hademus ná.
04/02/2007
Enus urtimus añus desisti un enterés crecienti ena recuperanza, el mantenimientu y revaloranza de las palras hucheás vernáculas al menus nel mundu cibelnéticu qu’es la redi e redis, Enterné. Asina puemus guipal páhinas escribias en liones – asturianu, estremeñu, cantabru, aragones, e incrusu n’andalus. El hechu e revaloranza y mantenimientu puen sel sostribás pol una gran mayoría peru nu es asina la recuperanza. Abondu lingüístas y legus nu crein ena recuperanza d’una luengua o palra cuasi que esaparecía pol el metoicu labutu d’emposición duna sola palra y curtura comu aconnteci nel chascu España con el castellanu.
Cá luengua retieni la visión del mundu de lus sus palrantis: comu barruntan, qué valoran, en qué crein, comu sazalachan el mundu que tienin alreol, comu organizan la sus vias. Cuandu mueri una palra se pierdi pa sempri una parti e la curtura.
Paici mentira que pa efendel cualisquiel cosa deseguía sargan corrobras que efiendin tala o cuala cosa peru pa efendel las luenguas qu’andan a espichala, a arrugal el hocicu, estiral la pata, dilsi pal enhalbegau, a puntu endiñala, crial malvas etc nu se sienta a naidi o a cuasi naidi gañital ná.
Nel chascu l’estremeñu nu se conocin con esatitú el númiru e palrantis, cosa normal si s’enceta que ni siquiá tie consideranza e palra pol abondu lingüístas y idin palra e transición, sudialeutu e nu se que palti el liones, palraera el nolti e Cazris y algotra cosinas mas destas que se puen guipal y leel. Y que lus palrantis lehus e sentilsi erguyosus le tien arregañu y en cuantu que palran con foriatus muan la su prenunciación y vocabulariu ahustandusi a lu que crein que tie que sel l’estandal. Asina nu es d’estrañal que sargan lus datus que salin, si ni tan siquiá argunus estremeñus abin que cuandu idin coruha, millu, barrera, dagal, añurgalsi, mollera, barruntal etc etc nu andan palrandu castellanu.
03/02/2007
Sigún almienta la Costitución Española nel su articulu 3:
3.1 El castellanu es la luengua española oficial del Estau. Tos lus españolis tien el debel de conocela y el drechu a usala.
3.2 Las otras luenguas españolas sedrán tamién oficialis enas sus respetivas Comuniais Autonumas dalcuerdu conus sus Estatutus.
3.3 La riqueza e las deferentes moaliais lingüísticas d’España es un patrimoniu curtural que sedrá ohetu d’especial respeutu y proteción.
La realiá entovía esta mu lehotis de lu idíu pola Costitución, mu a pesal de que ya nu desisti la presecución qu’antañu ubieri a las otras luenguas deferentes al castellanu. Ya nu se proibin diretamenti comu ena ditadura pero entovía nu se hadi lu que la tan almientá costitución (sigún pa que chascus) idi alrespetivi. Ca día se hadi mas huerti el usiu nolmativu el castellanu recarcandu la desiguardá d’esti sobri las otras luenguas “españolas” hata tal puntu que ya son sinonimus castellanu y español. Ya nu es l’estau quien presigui a las otras palras y luenguas sinu corrobras y estitucionis supuestamenti pubricas y subencionás ...
Asina nu mus ebi d’estrañal quel estatutu e Castilla Y Leon nu arrecoha lus drechus lingüísticus des Liones ni del gallegu que se palra nel su territoriu y que nel estatutu d’Asturias nu contempri la cooficialiá l’asturianu sinu solamenti la su proteción y ya ni salcuerdi del eonaviegu, que pa Estremaura ni s’almienti ná de l’estremeñu (qu’esu ya sedria cieccia fición ya que sigún lus maestrus la palra castellana ni semus palra ni semus ná, amas que ya esta criandu malvas, hateau conel trahi maera, espichau del tó, amus que nu lu palra ni dios, ni tan siquiá s’alcuerda naidie de qu’era esu l’estremeñu) y que idil del portugues que se palra entovía pa las tierras estremeñas ... y a fala de os tres lugaris...
Denguna e las comuniais con palras minoritarias tie ná hechu pa protehelas ni promocionalas, ni lus sus estatutus las tien en considerancia. Asin se da la paraoha que pa Portugal el liones o asturliones tie estatus oficial andi solu tieni unus 15 mil palrantis (mirandes).
L’estau español sigui promoviendu el usiu escrusivu el castellanu huera el su territoriu sin almiental ná de la desistencia de dinguna otra luengua palra nel su territoriu (ni tan siquiá las oficializás). Darguna maera entovía se hadi guerra a las otras luenguas españolas y las sus variantis. Alúu de mas de 30 añus de contitución ni siquiá se sabi cualis son esas otras luenguas palrás nel territoriu y amas se homenta la su deferenciación hiendu que nu pretenecin al mesmu troncu lingüísticu, qu’andan esaparecias, que nu tienin estoria escribía, que son vurgarismus castellanus ... y algotras perlas mas pa hadel despretihiu e las mesmas.
Archivo
| Quieres crear un Blog aquí
Sitio desarrollado, diseñado y gestionado 100% con Software libre: GNU/linux, GIMP, PHP, MYSQL, APACHE, ...
