Santibañez el Alto
09/10/2006
Hoyus situau nel coradon la Sierra ‘e Gata, a 510 m d’altitu s’alcuentra sostribau a lus pies el monti Molcalvu de 1.055 m. En mitá un valli acomuelgau ‘e manantialis que hadin qu’en Hoyus aiga cantiá ‘e huentis comu la de San Lorenzu, la huenti’l Hondon del lugal, la huenti’l Cosu, las Dos huentis la praza la Capilla.
Hadiendu encahi bolillus ena praza. Típicu nu sólu de Acebu.
Hoyus nu es la mas populosa las pobracionis peru se pue idil qu’es la capital la Sierra ‘e Gata ya que pa hadel cualisquiel papeleu tantu de hulgau, notariu, rehistru, o al INEM, tamién tieni entri algotras cosas correus, centru salú, hormación profesional, Guardia Civil, Guarda forestal, elipueltu, gabineti sicopedagohicu del MEC etc y dendi 1840 es la caeza ‘el partiu la comarca.
El su terrenu e d’apenas 1500 etárias y vivin unus 1100 abitantis hadi que las sus callis esten en mu güen estau y conselvas, manteniendu la su estetica serrana. Se puen vel casas tipicas, palacius polas sus callis empedrás y abondu escús de lus sigrus XV y XVI. Nel lugal diban a pasal lus vranus lus obispus y familias puyentis d’antañu y vvelei lus escús que se puen guipal polas fachas las casas.
Hoyus linda con Acebu pal norti nel regatu la Barquera, con Trevehu nel oesti y Peralis pal sul.
El pueblinu esta rodeau de güertus con naranhus y limonerus y anque paeza mentira se puen vel secuoyas y guayabus, ya qu’el clima meyiterráneu continetal temprau hadi que puean dalsi, anque nu seyan autotonas. La temperatura anual meya comu’n cuasi que to la sierra ronda lus 14º C y el su paisahi esta prencipalmenti compuestu pol robrealis, alcornoquis, castañus huntu comu no a lus olivaris y parralis.
Comu cuasi que to lus pueblus ‘e la Sierra ‘e Gata el su orihin (anque pue que seya anteriol polus restus alcuentraus ) se situa ena reconquista del Reinu ‘e Lión.
La ilesia y la su facha tieni restus romanus y paleocristianus, hué restaurá ena reconquista de 1166 pol Fernandu II que la entriega pa la ordin del Templi, se pierdi en 1174 y s’arrecupera de nuevu en 1179. La torri la ilesia se poni entri’l 1606 y 1616 y en 1624 el Obispu Don Herónimu Ruiz de Camargu bendici la campana mayol bautizándula con el nombri de Santa Maria. Puen velsi dos ñius de cibueñas nel vranu en tol picorru, danduli un airi mas serranu si cabi. Nel 1723 se coloca un nuevu retablu ena ilesia cona imahin del Buen Varón y el viehu se eha ena ermita San Lorenzu.
Ena guerra la endependencia lus francesis que hidierun lu suyu pa la sierra comu efaratal el castillu ‘e Trevehu tambien se hidun cargu achacinandu al obispu ‘e Coria Huan Alvarí de Castru nel 1809 ena su casa de Hoyus.
El centru’l cascu estóricu s’alcuentra alreol la ilesia de Muestra siñora del Buen Varón que la rodean tres prazas, la Praza la Costitución, la Praza Mayol y la de Gabriel y Galán o el Cosu, antañu praza ‘e torus.
Haranas se hadin varias comun cuasi to lus pueblus, las prencipalis son las dedicás al su patrón San Lorenzu, el 10 y 11 ‘e agostu, la Romeria al Carrascal el tercel domingu ‘e mayu, la feria ganaera el 15 ‘e huniu, San Linu el 23 de setiembri, asin comu lus antruehus, la selmana santa, san Huan ...
En Hoyus se pue manducal dendi’l condumbiu tipicu la zona despricau n’algotru post asta comia Italiana supilelaborá con toquis serranus y to. Y comu no to regau conel vinu la sierra.
15/09/2006
Quieru piil perdon pol nu sel un güen escribiol y nu sabel idil to lu güenu que tienin las Hurdis, esti post es simplementi una escusa p'autualizal y endilgal dalgunas afotus "e las Hurdis hechas esti vranu.
“Si en toas partis ‘el mundu l’ombri es ihu la tierra, enas Hurdis la tierra es iha lus ombris” Miguel de Unamuno
Las hurdis escomienzan andi acabiha la pantasia’l sueñu.
Las Hurdis estan situás al norti la provincia Cazris, linda cona Sierra ‘e Gata, El Ambroz y al norti cona provincia Salamanca. En total el su terrenu es de mas de 508 km2 acomuelgaus d’estoria, paisahis y traicionis.
Las Hurdis estan hechas enus lombus ‘e las Sierras Las Mestas, La Correera, Cordón y El Retamal y entri ellas lus vallis El Ladrillal, Del Riu Hurdanu, el Esperaban y el valli ‘el riu Lus Anhilis. Se puen vel y subil a lus picachus ‘El Mingorru y la Bolla de 1627 y 1519 m asin comu a la Corchera de 1592 m.
Las Hurdis tieni una mu espléndida vehetación: helechus, haguarzus, haras, lirius, berezu entri lus arbustus y arbus comu alcornoquis, castañus, cerezus, ancinas, olivus, tehu, matochus y carrascus anque tamién puen velsi pinus y ucalitus que s’an plantau pol me las lumbris qu’algunus desalmaus hadin (comu’l de hadi tres añus andi prendio parti Aldehuela y Erias)
Con estus montis y arbus comu no tamién ay abondu animalis que pues alcontralti comu la cabra montesa, comadrehas, conehus, gatus montesis, hinetas, habalinis, dorras, luntrigas etc comu tamién águilas, azoris, buitris, milanus, perdicis, etc lagartus, vivoras y bastardus tamién pues alcontralti ... Antañu se sabi q’ubu osus, ciervus, lobus y algotru animal qu’ogañu de siguru nu salcuentran ya pol me las presonas.
Lus rius mas emportantis ‘e las Hurdis son el riu Hurdanu, el riu Ladrillal y el riu Lus Ánhilis, peru ay abondu regatus y algotrus rius mas chicus uqe hadin piscinas naturalis d"agua limpia y fresca, andi pues dalti un güen chapuzón nel vranu.
Piscinas de las Erias
La riqueza traicional ‘e las Hurdis de siempri a estau basá enus sus frutus naturalis: corchus ( la mehol miel la hurdana sin lugal a duas) , olivus, la corcha, ceredas erc peru dendi hadi unus añus el turismu tamién s’a convertiu en una huenti emportanti d’ingresus. Las Hurdin ya un son lu qu’antañu huerun, agora puen guipalsi las tipicas casinas hurdanas paré medianil con una casa levantá ‘e ladrillu en cualisquiel alqueria. Anque entovía y menus mal se tienin en pie güen númiru d’ellas sobri to enas alquerias. Las casinas tipicas hurdas es una cosa mu enteresanti que mereci un apartau especial si soy escapá y tengu arbeliá algún día de hadelu.
Casas del Gascu
Luis Buñuel ihu ena su pelicula que no sintio cantal denguna canción enas Hurdis, quicias hué pol regañu lus hurdanus a la ora de labutal, henti curtia pola naturaleda y el labutu que si sabin hadel peronias emportantis comu lus antruehus, la enrramá, la carvochá, la matanza, el robu l’albehaca, la gaita y el tamboril que puen sentilsi en cualisquiel alqueria que s’alcuentre hadiendo harana pol chica que seya.
Polas Hurdis se puen hadel abondu rutas pol mitá el monti, vel enteresantis muestras d’artesania, vel petroglifus, manducal pratus tipicus y sobri to disfrutal la ospitaliá las sus hentis.
Es una lastima que un seya yo un güen escribiol pa idil to lu güenu que tienin las Hurdis, lugal máhicu qu’ay que descubril paseandu polas sus alquerias y palrandu conas sus hentis y orvial la leyenda negra que pesa sobri ellas sin orvial la verdaera esencia ‘e las traicionis que pocu a pocu s’estan queandu comu n’algotrus lugaris d’Estremáura pol querel sel moelnus sin sabel dali el valol que verdaeramenti tienin. Nu ay que teneli arregañu a lu qu’antañu huerun y lu que lus mayoris mus eharun, leyendas y traicionis.
12/08/2006
Luetiga Nel el viehu
Soy Nel el viehu un corzu de mu güena suerti
es ciertu que no es casualidá los mis años
en los montis de Ucieda esta´l mi hogar
auga en abundu, hojas tiernas al amanecer y al escurecer
Una mañana mu trempanu oilos al llegar
eran cazaoris que supian que yo estaba aqui
Es arraigau el movesi o el hacer ruiu,
los sus perros ulfatian mu cerca de mi, mu cerca de mi
Cuandi güelvin to los años pa hacer sofrir,
no entendemos que matar sea la su distraicion
los temblíos de la tierra con las sus pisás
barruntaban qu´algu tristi diba soceder, diba soceder
Cuerri, cuerri Nel el viehu pola tu vida
los perdigonis pasan por encima tuyu
las cajigas y las hayas sospiran por ti
cuerri, cuerri Nel el viehu pola tu vida, pola tu vida
Quicias quedran desicarmi pa que sea immortal
colgando la mi cabeza en la pared d’un bar
tol tardiu y l´inviernu podri respirar
el nuestru miedu porque ya devueltu en fue’l terror,
en fue’l terror.
A la mejor m´enquivoco y no vien por mi
salvandomi comu otras vecis ya paso
las pantasmas los mis hermanos muertos por ellos
dihen en mi que tuvia qu´escapar d´aquí, qu´escapar d´aquí
Cuerri, cuerri Nel el viehu pola tu vida
los perdigonis pasan por encima tuyu
las cahigas y las hayas sospiran por ti
cuerri, cuerrin Nel el vieju pola tu vida, pola tu vida.
Hadi un tiempinu ya, landeandu pola redi m’alcontre con esti grupu cantabru. La mi solpresa hué grandi al sentilus la primel vedi, cantan en cantabru ¡! Y que paeciu a l’estremeñu anque con dalguna qu’otra deferencia craru esta, peru lu basicu pue sentilsi. Asin que palli p’arriba tien una palra qu’es paecia a la muestra ... ( Quieru sel ironicu pa quien nu lu noti...)
La canción presonalmenti me peta abondu, siempri ay que andal curriendu y a vedis huyil si nu quieris un zurriagazu.
Vus recomiendu que merqueis el discu andi s’alcuentra esta canción del mesmu titulu qu’ella, nel qu’alcontrareis cancionis mu pulias y anque nu seya la muestra palra que mas puemus piil, si es lu mas paeciu que puemus alcontral. Si dalgunu sabi d¡otru grupu que canti n’estremeñu hadelmilu sabel, hadel el favol.
04/08/2006
El III Alcuentru de bailis y danzas de las comarcas asturlionesas.
L’alcuentru esmienzará conun pasacallis en Santibañiz el Bahu y acontinadra conas autuacionis grupalis.
Cona entención d’encental un helmanamientu entri las antiguas comarcas que hemenciarun el reinu Lión se pusu en marcha hadi tres añus ya en Santibañiz el Bahu un festival nel que se reunin balburdas folkloricas d’estus lugaris, que son d’estremáura, Castilla y Lión en incrusu dalgunas comarcas portuguesas. Dendi altoncis esti festival tieni muchu esitu y veleí qu’ogañu se celebri la su tercel edición.
El festehu d’ogañu tendra lugal nel mes d’agostu, pos anque seya costumbri hadelu pa setiembri, duranti el vranu es cuanta mas henti ay pa lus pueblus.
Pol mé lus autus folkloricus, s’alcuerda lus ñus d’uñión d’estas comarcas d’influhencia asturlionesa, viendusi las raicis qu’esistin enus ambitus la etnia y la música, lu qu’implica diretamenti lu aparenti ena música, al igual que son comunis lus orihinis lingüísticus.
Pograma
Esti domingu, a meyia tardi, las balburdas particiepantis esfilaran polus deferentes barrius ‘el lugal. Lus grupus d’ogañu son la balburda folklorica El Chamariz, de Fuentehinaldu (Salamanca)Airis Serranus, de Cillerus (Cazris) y unu portugues entri otrus amas del que hadi el eventu la Corrobla folklorica Valdelagaris. A las 19:30 ena praza mayol, tendrán lugal las autuacionis.
Alúu dispués las autuacionis, l’arcaldi, Miguel Antoniu García Pintol, hadra entrega d’unus regalus simbúlicus a lus particiepantis.
La jorná amenizara conel vinu d’onol correspondienti y la confratelnidación entri lus miembrus lus grupus, que suelin acontinal conus bailis y musica una vedi acabihás las autuacionis.
Pol momentu lus gastus d’esta harana corrin a cargu l’ayuntamientu ‘e Santibañiz el Bahu, anque se pretendi emplical a la conseheria ‘e curtura pol mé el su diretol heneral de promoción curtural, ya que’l festival pasa la frontera autonómica y tie un caraiti sociocurtural.
http://www.hoy.es/pg060804/prensa/noticias/Prov_Caceres/200608/04/HOY-PCA-104.html
03/08/2006
Landeandu ena redi m"alcuentru ena Wiki esti articulinu mu tipicu y repetiu en abondu lugaris web idiendu siempri lu mesmu sobri l"estremeñu peru siempri en castellanu y m"entran unus arrepius... a vel si naidie sabi hadelu n"estremeñu conchu¡¡
Es menestel que pa efendel al muestra palra se haga to lu que puamus en ella anque seya pa idil ná sobri ella mesma, asin que a horopu sacau m"e puestu a traucilu y velequi el resultau, qu"anque puyera idilsi mehol e queriu que huera lu mas fiel al orihinal anque me hiervi la hangri al leel dalgunas cosinas que poni, cuantu cutau anda suertu ... peru craru comu semus lus urtimus en tó y amas nu mus sientin nunca gañital pol ná... y menus pola muestra palra pola que dalgunus tienin arregañu, pues acontinadremus asina.
Dialeutu estremeñu
De Wikipedia
L’Estremeñu es el dialeutu ‘e la balburda asturlionesa (nel sentiu filulóhicu ‘el telminu) palrau nel noroesti d’Estremáura y sul ‘e Salamanca, clasificau heneralmenti endrentu ‘e las palras d’España pol corroblas enternacionalis y nacionalis, a pesal de nu sel ofidial enas comuniaís andi entovía se palra.
Tamién recibi’l nombri ‘e castúu, anqui esti télminu pue fruhil aturullu, pues asina tamién se huchean las palras ‘e transitu conel liones (castúu) comu a las palras castellanas del orienti Estremáura y pobracionis de Sevilla y Córduba de influhencia lionesa.
Se galra enas comarcas salamanquinas d’El Rebollal, sul de Ciuá Rodrigu y de Behal. En Cazris se palra enas comarcas ‘e la Sierra ‘e gata, Las Hurdis, Guihu ‘e Santa Balbara, Valli l’Alagón, Riberus ‘el Tahu-Alagón, Riberus ‘el Tahu-Almonti y pobracionis del Valli ‘el Herti comu el Piornal, Rebollal, El tornu, Valli l’Ambroz, Monfragüi y en Bercozana, Madroñera, ena comarca ‘e las Villuercas-Guadalupi. Tamién se galra una varieá a meyiu caminu entri l’estremeñu y el portugues ena villa portuguesa de Barrancus, ena frontera lusa con Estremáura y Andalucía.
Las estaísticas sobri’l númiru ‘e palrantis son antiquás y no mu fielis. Es posibli que seyan unus milis lus mayoris qu’entovía tienin rasgus dialeutalis que puen identificalsi conel estóricu dialeutu asturliones.
Tabla ‘e contenius
1. Variantis
2. Estoria
3. Carauteristicas.
4. Corroblas y meyius.
5. Crasificación.
6. Guipal tamién.
Variantis
Palra d’El Rebollal
Artuestremeñu ocidental
Palra ‘e Garrovillas y Serrailla
Barranqueñu (ena cilla ‘e Barrancus, Portugal)
Artuestremeñu meriyional (influhencia)
L’Estremeñu es crasificau normalmenti en tres variantis: artu estremeñu, meyiu estremeñu y bahu estremeñu.
L’artuestremeñu es considerau comu dialeutu (o palra) y lu galran ena zona norociental de Cazris y la sulociental de Salamanca.
El meyuestremeñu y el bahuestremeñu son dendi el sigru XVII palras castellanas de transitu conel liones (comu las palras murcianas lu son conel catalan) y la su influhencia llega mu levimenti a la Sierra d’Aracena, en Güerva.
En Barrancus, pueblu portugues situau ena frontera con Estremáura y Andalucía que hue repoblau ena Edá Meyia con onubensis de palra lionesa (estremeña), se galra el “barranqueñu”, un arrebuhu entri estremeñu y portugues.
Estoria
La parti ociental d’Estremáura hue reconquistá pol Reinu ‘e Lión, ensiendu l’asturliones el dialeutu estóricu latinu usau polus repoblaoris, que esmienzun cona repoblación alreol el sigru XII.
Tras uñilsi lus reinus de Lión y Castilla ena Corona ‘e Castilla nel 1230, el castellanu ocupo el su lugal arrinconandu al latín comu palra ofidial de las estitucionis, desapartandu asina l’asturliones comu seña ‘e probecia e inurancia d’aquellus que lu palraban. Solu p’Asturias (andi tuvu la su nacencia la palra) las presonas eran coscientis de galral una palra deferenti al castellanu. Peru encrusu allí solu dalgunus autoris lu gastraban enus sus escritus.
Probabrimenti hué pol mé l’influhu curtural de la Univelsiá ‘e Salamanca la rápia castellanización d’esta provincia, zalachandusi asina el dominiu asturliones en dos dendi cuasi qu’el enceti, l’asturianu o asturliones pal norti y l’estremeñu pal sul del antigúu reinu ‘e Lión. L’aspansión del español tamién se prouhu dendi el sul, conel crecimientu económicu ‘e la zona ociental de la provincia ‘e Badahó.
El sigru XIX guipo’l primel ententu seriu d’escribil n’estremeñu, pol famosu pueta José Grabriel y Galán. Anque la su nacecia hué salamanquina, vivió la mayol parti la su vía nel norti ‘e Cazris. Escribió n’estremeñu, enllenu ‘e restus dialeutalis, peru siempri barruntandu en castellanu y ena horma castellana ena su describiura.
Alúu d’esu, lus localismus an siu la horma d’efendel l’estremeñu, y veleí qu’oy dalgunus tratan de revivil la palra y hadel el noroesti Estremáura una rehión bilingüi, metras que la Hunta Estremáura y la de Castilla y León y el restu las estetucionis ofidialis estatalis crein que la mehol solución es efendel la estensión y deprendizahi ‘el castellanu nolmativu ena zona. To estu uñiu a lus continuus ententus pol denominal al meyuestremeñu y al bahuestremeñu comu palra – el castúu, telminu arrecohiu pol pueta de Gaureña, Luis Chamizu (fenóminu arrepetiu en Murcia col murcianu y en Andalucia col andalú) hadin entovía mas enrrevesinau efendel la verdaera palra estórica y más fácil el arregañu ‘e la alministración a la normalización y deprendizahi l’estremeñu.
Las cifran anque igan que ay cientu ‘e palrantis (200.000 palrantis ativus sigún el ethnologue) es posibli que solu unus milis ‘e mayoris acontinuen entovía palrandu con rasgus dialeutalis asturlionesis y estremeñus. Anque la mayol parti las estitucionis internacionalis y dalgunas españolas reconocin l’estremeñu comu palra d’España (huntu l’asturliones y l’aragones) a pesal de un tenel oficialidá dalguna, ni sel co-oficialis, es d’esperal que sin ayua, sin normalidación y sin eshuerzus educativus pol parti l’alministración la palra estremeña esta enas urtimas boqueaes, condená a desaparecel y a convertilsi en otra varieá castúa mas.
Carauterísticas
Rasgus típicos asturlionesis
Ø Palatalización de la -l en restus lexicalizaus: llal (lar), lludia (levadura),...
Ø Afechamientu heneral ‘e las vocalis -o, -e: trampusu, pirru, nigru, ...
Ø Restus lesicalizaus ‘e la F- anicial latina: fogal (hogar), fala (habla), fechal (cerrar)...
Ø Aspiración heneral de la F- anicial latina: h.ierru (hierro), h.íu (hijo), h.umu (humo), h.oscu ("hosco", oscuro), h.uerti (fuerte), h.adel/h.el (hacer)...
Ø Ditongación frecuente: cuelmu (colmo), duelu (dolo), priessa (prisa), carueçu (carozo), alcuentral (encontrar),...
Ø Palatalización ‘e la -n: ñubi (nube), ñúu (nudo), ñeblina (nebliana), ñuca, ñuera, ñiñu, ñogal, uñil, cañali (canal),...
Ø Conselvación ‘e la antigua -e latina: redi (red), h.oci (hoz), h.azi (haz), cruzi (cruz), tosi, vezi, peci, vozi, sedi, vidi,...
Ø Hormas ocientalis enas balburdas latinas -cl-, -pl-, -fl-: achegal (llegar, conseguir, del lat. PLEGARE); flama, chamá, chamaina (llama, fuego,... del lat. FLAMA); achanal (allanar, del lat. PLANUS); ...
Ø Hormas verbalis huertis: h.izun (hicieron), truhun (trajeron), carçun (calzaron),...
Ø Tenimientu d’antiguas aspiracionis: heneru (enero), giernu, gelal (helar), genciva (encía), gelmanu (hermano),...
Ø Plural femeninu -es y hormas verbalis -en, -es ena casi relindá "palra d"El Rebollal": les coses, les puentes, cantaben, llorabes,...
Ø Epéntesis de -i-: unturia, grancia, urnia, matancia, esperancia, atah.arria, comienciu,...
Ø Tendencia a la pérdia ‘e las consonantis sonoras derivás de las sordas latinas: mieu (miedo), tou (todo), fuèu (fuego), lau (lado), Estremaúra (Extremadura),...
Ø Tenimientu del grupo -mb- latinu: lambel (lamer), lombu (lomo), camba (cama), pomba (paloma), gamboniteru (gamón),...
Ø La balbulda consonántica motiva pol pérdia ‘e vocal latina, la primel consonanti se hadi -l: hulgal (juzgar, del lat. IUDICARE), relva (de RETOVA), duldal (dudar, del lat. DUBITARE),...
Ø Muación de la balbulda -rl- latina: mielru (mirlo), palral (hablar, de PARLARE), calranca, chalra, bulra, pelra, cholritu,...
Ø Lesicalizacionis col prefihiu aumentativu per-: percayíu, perh.inchil,...
Ø La l>r en dalgunas balbuldas consonánticas: igresia, praça, ...
Ø Tamién la r>l: plau (prado)
Ø Contración en + artículu: nel, ena, enus, enas/enes
Ø Usu del posesivu enantis ‘el artículu: el mi h.íu, la tu casa, las nuestras vizinas,...
Ø Amenidación heneral y diminutivu: -in, -inu
Rasgus propius l’estremeñu
Ø Acabihamientu heneralizau de -r latina en -l: rompel, trael, ardol, abriol,...
Ø Tenimientu las consonantis sonoras, comu nel portugués o el catalán: ca^sa, vizinu, cozina, co^sa,...
Ø Destinción b-v y b-B ena palra ‘e Garrovillas y Serrailla: caBeça (del lat. CAPUT), aBril (del lat. APERTUM), caBra (del lat. CAPRA), riBeru (del lat. RIPA),...
Ø Acabihamientu plural -us, -is (en vedi de -os, -es comu es heneral n’asturianu): carrus, cancionis, perrus, alreoris,...
Ø Hormas aglutinás: megu (conmigo), tegu (contigo), segu (consigo), nogu (con nosotros), vogu (con vosotros) (del lat. MECUM, TECUM, SECUM, NOBISCUM, VOCUM)
Ø Aspiración del fonema antigú /x/ (comu nel castellanu meriyional) pol influhencia ‘e la aspiración de la F- anicial latina: caha, paha, rohu,...
Ø Aspiración ‘e la -s en posición implosiva o apertura ‘e vocal que la precei (comu nel castellanu meriyional), presencia d’asta 10 vocalis (y no sólu ochu, pola apertura las vocalis finalis -u-, -i-, que nu pue dalsi nel castellanu)
Ø Hormas verbalis ‘e la balburda -zc- en -z-: conoçu, agraeçu, paeça, creça, reuza,...
Ø Hormas verbalis condicionalis: sedríe, h.adríe, abríe,...
Ø Perdia acostumbrá de la -d- intirvocálica
Ø Estrebehil ‘e hormas presentis (comu enas palras de Murcia): nuh.otrus palremus (en vedi de "musotrus palramus", "nosotros hablamos"), cantemus, ...
Organizacionis y Meyius
Ay una organización ena Comuniá d’Estremaura que defiendi las varieais lingüísticas estremeñas, APLEx [1], en especial a fala, l’ artuestremeñu y el portugués, anque tamién s’enteresa `pola conselvación de lus rasgus propius del meyuestremeñu y bahuestremeñus y to las demas palras castellanas ‘e la comuniá. Asta hadi bien poquinu ss’espublicaba una revista eletronica n’estremeñu Belsana, tamién se hadi una revista ena palra d’El Rebollal, la Gurulla y un noticiariu eletronicu, Iventia, escritu to en “Estremeñu unificau”, palra d’El Rebollal y A Fala, la otra varieá tipicamenti estremeña. Amás Manuel Trinidad, tieni ya añus arrecohiendu infolmación sobri las palaras d’estremáura (asturlionesas, galaicu-portuguesas y castellanas) estandu encluia ena seción de Dialeutolohia ‘e la Biblioteca Virtual Estremeña (BVE)
Crasificación
Induropeu > Itálicu > Retola Romanci > Romanci > Palras Romancis Ítalu-Ocientalis > Retola Ítalu-Ociental - Suretola Ociental > Retola Galu-Ibéricu > Retola Iberu-Romanci > Retola Iberu-Ociental > Suretola Astur-Lionés > Estremeñu
Guipal tamién
Detalli de comarcas d’Estremáura.
Detalli ‘e municipius d’Estremáura.
Güiqipeya Tallu POs creemi Raul qu\'entovia palramus asina unus cuantus [...]
Articulu 3 Joan L'inculte del comentari 1 es desqualifica per ell [...]
Güiqipeya Raúl Hola, Nací en Badajoz pero mi familia entera es [...]
El III Alcuentru de bailis y danzas de las comarcas asturlionesas. Álvaro Hola, estoy muy interesado en encontrar tesis doctorales [...]
Atitú lingüística Nelu Un saludín dende Asturies pa toos/es los/es collacios/es [...]
Añadir Feed a:
Archivo
| Quieres crear un Blog aquí
Sitio desarrollado, diseñado y gestionado 100% con Software libre: GNU/linux, GIMP, PHP, MYSQL, APACHE, ...
