Santibañez el Alto
26/07/2006
L’orihin ‘e la Torri de Don Miguel se ebi al comendaol de Santibañiz Frey Miguel Sanchi, quien mandu hadelsi una casa al lau d’una calzá romana de tantas que recorrin la sierra y poquinu a pocu hué creziendu el pueblu asta sel villa. Desistía nel ayuntamientu un documentu andi idia que s’autoridaba a lus torrosnerus a fruhilsi to las piedras que les hueran menestel del castillu 'e Santibañiz pa costruil la Torri.
Paseal polas sus callis estrechas con esi airi d'antañu.
Entri lus igrus XII y XVI se hemencia la Torri ‘e Don Miguel, el 9 d’eneru de 1441 Don Gutieeri Sotumayol mienta la Torri comu Villa y es posibli que huera el mesmu que le diera el rollu y el su titulu ‘e villa.
El Maestri D’Alcantara Huan de Sotumayol desaparta unas tierra (La hesa ‘e Pastu, Labol y l’arenal) qu’eran ‘e Santibañiz pa dalsilas a la Torri pa que la tuviensin comu hesa.
Paisahi 'e lus alreoris la Torri 
El 20 ‘e setiembri de 1486 el Maestri Huan de Zuñiga da a la Torri, desapartandulas de Gata, Santibañiz y Villasgüenas las tierras a la drecha ‘el caminu Reina andi se desaparta del de Santibañiz, asta la Hesa el Boyal, polas Medianas y lus Lavahus asta la cima la Aliseda nel Guiharral acontinandu pol telminu ‘e Gata asta Valdevolmenas.
Volaizu tipicu
Ena praza qu’es cuadrá (mehol idíu retangulal) s’alcuentra el ayuntamientu, una huenti y la ilesia de Muestra Siñora ‘e la Asunción con un hardincinu hucheau reutu.
Praza Mayol cona Ilesia L'Asunción
L’armita el Cristu esta nel sul del pueblu, a la entra dendi la carretera y data sel sigru XIV, l’armita ‘e Bienvinia salcuentra ena carretera hacia Cahalsu, andi se hadi una güena peronia el día la su celebración, el segunderu domingu alúu la Pascua ‘e Resurehción, hadiendusi una romeria dendi el pueblu asta l’armita y a la nochi el capazu, traición qu’a siu arrecuperada y qu’andinantis se hadia en otrus pueblus tamién.
Caminu l'Almenara, y el simbulinu 'e la Sierra 'e Gata.
L'Armita el Cristu.
Nu vus orvieis de manducal y bebel el condumiu y el vinu qu'ay pol to lus pueblus 'e la sierra, vali la pena.
21/07/2006
Esti articulinu eberia abel siu enantis qu’el de Santibañiz, pa ponel a la henti en situación sobri qu’es y andi cai la Sierra ‘e Gata, mas que ná pol si entovía ay dalgunu que nu lu sepa.
La Sierra ‘e Gata esta situá nel norocienti la comuniá d’Estremáura. Linda con Portugal al oesti y con Salamanca al norti y conas comarcas las Hurdis, vegas d’Alagón al noresti y al sul. Esta hemenciá pol cincu vallis y abondu montis, dalgunus comu el Xalama con 1492 m. el Hañona con 1367 m. el Espinazu con 1342. la Bolla Grandi con 1519 m. y tamién la albundancia ‘e rius y regatus comu el Elhas, el Arragu, El Tralgas, asina comu lus pantanus el Bolbollón, el embalsi Rivera ‘ e Gata y el Atalaya hadin ‘e la Sierra un paisahi repuliu pa lus amantis ‘el senderismu y la naturaleda.
Vistas del pantanu Bolbollón
La Sierra ‘e Gata a siu testigu d’invasionis y runchas entri pueblus dendi Viriatu, asta reinus y paisis cona guerra la endependencia, tamién á siu frontera y lindi entri morus y cristianus, á siu tierra ‘e vettonis, romanus, visigodus,hudius, arabis y lionesis. Tierra en runcha y runchaora comu atestigüan lus restus lus castillus d’Elhas, Santibañiz, Trevehu y la Almenara ‘e Gata.
Castillu "e Trevehu
Almenara "e Gata 
Manducal un pratu tipicu pue hadelsi en calisquiel taberna y enus albundantis mesonis y restauranis qu’ay pa lus pueblus. Cabritu, pecis fritus, patatas con bacalu, un mohi pimientus o guindas picantis, una ensalá limonis, to ellu hechu cona mehol adeiti el mundu. Tamién el quesu ‘e cabra y oveha son mu cumprius pa comelus con un güen basinu ‘el vinu ‘e pitarra, que ya s’alcuentra pa mercalu peru si teneis opoltuniá y vus envitan al hechu enas boegas o boigas en San Martin, nu igais que no, frescu y cona calol que hadi nel vranu refresca el gañoti y quea el su sabol almendrau mu güenu. Y que idil ‘e lus durcis, las perrunilas, lus gruñuelus, lus pestiñus y el aguardienti brancu ....
Pa mercal dalgun recuerdatoriu y d’artesania son tipicus lus encahis ‘e bolillu, especialmenti en Hoyus y Acebu, tallas ‘e maera, cestus, sillas d’enea, castañuelas, gaitas y tamborilis y urtimamenti puedi alcuentralsi cosinas turisticas tamién comu colgantis, pendientis, camisetas etc con motivus serranus.
La frora y lus animalis salvahis son albondantis y divelsa. Robri anque aquí se huchean matochus (meluhu, carvallu, serval y almez), ancinas, castañus, alcornoquis, madroñus haguarzus, berezu, haras, cornicabras, alisus, chopus, acebus, pinus, helechus, .... y d’animalis, linci ibericu, lobu, luntrigas, gatu montes, tehonis, hineta, cibueñas negras, agila rial, culebrera, calzá, alconis, buhus, gurullas, garzas, milanus lagartus, ranis, bastardus ....
Ran naandu nun chaguazu.
Lus 19 pueblus que cuaheringan la Sierra ‘e Gata son a cá cual mas enteresanti, tos tienin argu pa guipal y paseal polas sus callis y alreoris. Valverdi ‘el Fresnu, Elhas, San Martin ‘e Trevehu, Trevehu, Cillerus, Villamiel, Acebu, Hoyus, Peralis del Puertu, Villasgüena ‘e Gata, Santibañiz el Artu, La Torri ‘e Don Miguel, Gata, Hernan Periz, Cahalsu, Rebreillu ‘e Gata Descargamaria, Torrecilla lus anhilis y Villanueva ‘e la Sierra. Cá unu con el su encantu particulal, las sus piscinas naturalis, las sus casinas serranas, las sus ilesias .... un tesoru pol descubril.
Paisahis
20/07/2006
Güenu hadi tiempu ya que nu autualizu el mi blog y es pol qu'andau mu liainu nel mi labutu y alúu pos las vacancias que me las é pasau ena Sierra 'e Gata, recorriendu to lus pueblinus, to lus 20. Asina qu'agora toca endilgal las retratauras hechas a tos lus lugaris que m'an petau y describil un poquinu sobri ellus.
Velequi comu nu pue sel d'otru mou las primel afotus son del cotorru, Santibañiz el Artu.
Qué puemus guipal pa Santibañiz.... pos las sus callis toas en barrera comu nu pue sel d'otru mou. Las sus casinas tipicas serranas hechas con piedra, la muralla (pola que se pue pasal pordendima con cudiau) el castillu (lu que quea craru), lus miraoris ( dendi el miraol la traición y dendi el terregal se pue guipal cuasi que to la sierra y mas allá), la ilesia San Pedru, la ermita 'el Cristu benditu, las huentis que son unas pocas:
- La huenti las víñas, la huenti pica, la huenti lus frailis (esta tie un paseu mu puliu entri castañus y ancinas pol una calzá 'e piedra), la huenti fria, la huenti el calvariu, la huenti las colmenas, la huenti la traición, la huenti las eras, la polvorosa anque nu seya una huenti sinu un manatial d'agua sulhurosa con pueris curaoris), asina que si nu quies bebel na en cualquiel de las tabelnas ya sabis a enllenal el gañoti enas huentis de agua crara y fresca, anque polas nochis andi mehol s'esta es remohandu el gañoti enas tabernas del bahu nogal.
Casinas tipicas 'e piedra, mu serranas.
Castillu
Ermita el Cristu benditu
Zahurdon to esfarfallau pol caminu la huenti lus frailis
Detalli la pila la Dorra Zahurdon
Piscinas naturalis
El castillu San Huan "e Mascoras (Santibañiz el artu amus ...)
Dendi el pantanu el Bolbollón el pueblinu nel cotorru.
24/06/2006
La nochi mahica 'e San Huan
San Huan, la nochi 'e san Huan es la nochi mas corta del añu, es una nochi máhica ena que cuasi que to puedi ocurril.
Nesta peronia u harana se hadi l’aspresión d’un conceutu ciclicu y mahicu ‘e la via embahu el Sol qu’es a quien se celebra.
Pue idilsi tamién que la celebración ‘e la nochi ‘e San Huan se quea enus tiempus lehanus, dendi antañu se hadin camaronis u hogeras u capazus u hogará ( ay que vel la de nombris qu’ay pa mental lu mesmu n’estremeñu y esu que me queu unus cuantus) andi se prendi y turra to lu viehu pa pasal asina a una nueva etapa. El capazu u hogera es un cantu al sol, la lumbri purifica, mus purifica y el sol del dia ay que tomalu purificau, ay que recivilu col cuerpu y l’alma purificaus pol fuegu ‘e la nochi anteriol y l’agua o rociu.
To estu se hadi endenantis ‘el cristianismu y tie que vel colos ritus ‘e purificación, fecundidá, reheneración, el cudiau ‘e lus bienis y alehal lu malu, se pii al sol que nu pierda huerza.
Ya lus griegus hadian harana lus dias de lus solticius, tantu el del vranu comu nel del ivielnu, ellus idian que s’abrian las puertas. Lus griegus prendian camaronis en onol al dios Apolu y lus romanus dedicaus a la diosa ‘e la guerra Minerva enas qu’abia que saltal el camaron pa purificalsi y piil deseus. Lus bereberes tamién tienen lus sus ritus purificaoris col humu, al que consieran purificaol y protehtol lus campus sembraus.
Julio Caro Baroja mus relata la vinculación ‘e las hogueras y el Sol y mienta usius o costumbris d’orihin induropeu qu’entovía pirvivin entri musotrus:
El Sol sali bailandu ena mañana ‘e San huan.
Bañalsi o paseal descarzu sobri’l rociu la mañana asegura salú pa tol añu.
Adolnal las puertas y ventanas ‘e las casas con deferentis prantas sigún la rihión pa protegela ‘e lus rayus.
Esparramal enas puertas las casas con prantas y froris protehtoras.
Hadelsi enfusionis conas prantas y froris pa sanal diversas dolencias.
Hadel lus camaronis y saltalus pa purificalsi y evital dolencias.
En defenitiva ay abondu ritus y usius ena nochi ‘e San Huan relacionaus tos cola lumbri y l’agua pa purificalsi tantu esteriol comu interiolementi.
N’Estremáura tamién tenemus lus muestrus usius y costumbris al respehtivi la nochi ‘e San Huan y l’agua y la lumbri.
En abondu pueblus entovía s’estila enllenal una palangana u barreñu con agua nel que se ehan froris comu rosas, cravelis, tomillu... y se ehan to la nochi al serenu hata la mañana y alúu esa agua vali pa cural cuasi que to, peru sobri to las enfermeais ‘e la piel.
Una costumbri vista a la mi madri es la de rompel un güevu nun vasu pa vertel la crara nel agua pa asina vel el huturu a la mañana siguienti, se idi que sigun la horma que coha pue velsi argu emportanti que va a acontecel.
Otra es la de ehal tendia ropa pa que’l rociu la empapi y asina queal el puel en ella, esa prenda ‘e ropa apartil d’agora mus protehi. Dil a recogel trebolis, yerbagüena, froris ‘e lus helechus ( que un tienin peru se cree qu’ena nochi ‘e San Huan crecin).
Se tamién que la horma de hadel el camaron en argunus pruebus es mu especial, en Sanibañis el Altu, ena Torri ‘e Don Miguel y creu qu’en algotrus mas de pola zona se hadi el Capazu. El capazu nu es mas qu’el camaron peru la horma de hadelu es lu especial. Se pranta un trocu ‘e robri y se hundean las capazetas dil apañal las olivas prendias pa que se quein colgas y asina prendel el trocu, de mentras se baila alreol colos sonis ‘e la gaita y el tamboril. (Estu es un resumin mu resumiu craru esta).
Tamién se prendin maohus ‘e tomillu empapaus en agua pa que hagan huu y asina puel purifical la casa, nel Ahigal les huchean lus zahumeirus. Endispués conas cenizas se idi que pue curalsi y prevenil dendi la psoriasis a la sarna. El humu purificaol defiendi de las enfermeais, lus rayus, tormentas, mal d’ohu etc etc.
19/06/2006
Una deferencia qu’esisti entri lu estoricu y lu traicional tie que vel cona vía. La estoria es una retola ‘e hechus acaecius, muertus, fosilidaus, retratauras sin vía que mus valin pa conodel comu hué ca unu lus momentus que hemenciarun el pasau d’un pueblu. Peru l’estoria es o tie que sel irrepetibli nel presenti.
Tos tenemus sentiu esu de qu’un pueblu que nu conodi la su estoria esta condenau a repetila. Anque seya a la contra ’el pensamientu dalgunus filusófus y la su idea del etelnu retolnu, andi to se peiti, creu que si anduvieramus repitiendu la estoria acontecía sedria un castigu ya que cá momentu es irrepetibli, unicu.
Landeal ena estoria pa defendel l’inmovilismu es dil a la escontra la estoria mesma. La estoria solu esisti pol mé’l desarrollu las presonas, pola evolución del ombri. La estoria mus vali pa conodel el muestru pasau peru nu pa repetilu, nu pa frenal el cambiu.
Las tradicionis a la escontra la estoria si son argu vivu, son hechus del ayel que vivin entovía nel oy. Las tradicionis son argu vivu que muan con el pasu ‘el tiempu. Las tradicionis al sel argu vivu nacin, nu siempri an siu, muan y muerin ya que al sel umanas tienin el mismu amenizal que las propias presonas que las hadin.
Podria pensalsi que eberian moril cuandu el pueblu que las hadi u representa mueri temién, peru un siempri es asina. Las tradicionis muchas vedis pirvivin a pesal de tenel perdiu el su sinificau orihinal. Las tradicionis muerin cuandu nu puen o nu se sabi uñil el su conteniu conas nuevas ideas de la socieá andi se hadin. Cuandu una socieá nu sabi u nu alcuentra sentiu a la tradición esta ebi mual y adaltasi o mueri convirtiendusi en un hechu estoricu, argu muertu que ná mas qu’enteresa a lus estoriaoris y presonas enteresás ena estoria.
Continuará
Güiqipeya Tallu POs creemi Raul qu\'entovia palramus asina unus cuantus [...]
Articulu 3 Joan L'inculte del comentari 1 es desqualifica per ell [...]
Güiqipeya Raúl Hola, Nací en Badajoz pero mi familia entera es [...]
El III Alcuentru de bailis y danzas de las comarcas asturlionesas. Álvaro Hola, estoy muy interesado en encontrar tesis doctorales [...]
Atitú lingüística Nelu Un saludín dende Asturies pa toos/es los/es collacios/es [...]
Añadir Feed a:
Archivo
| Quieres crear un Blog aquí
Sitio desarrollado, diseñado y gestionado 100% con Software libre: GNU/linux, GIMP, PHP, MYSQL, APACHE, ...
