Santibañez el Alto
05/06/2006
Amus yo nu soy un cocinillas peru pol dil enllenandu estu con cosinas d"Estremáura que puen sel esconocias comu la su gastronomía y la su estoria nu me se cain lus anillus al metelmi ena codina.
Estas redetas nu son to lu elavorás qu"eberian selu, mas que ná pol que son de guipal abondu vedis comu las hadi la mi madri y d"animalmi a hadelas yo mesmu, asin que pueís landealas ena redi que de siguru dalgunu tieni describíu mehol que yo comu se hadin (estu si dalguien s"anima a hadelas craru ¡¡)
Pa hadel o idil comu se hadin lus gruñuelus, las perrunillas, la caldereta y demas platus nu me veu mu escapá peru si pa manducalus, ñascalus, enhilalus, hamalus, chincralus, repastalus, hincamilus,tempralmi, apipalmi, hartalmi el papu, ponelmi com"un triquitaqui, atracalmi ... amus comelus toitus.
Ensalá ‘e limón:
- Ingreyentis: Naranha, limón, güevus , choridu, ahu, sal, adeiti d’oliva, y azucal.
Se hadin roahas finas conos limonis y las narahas y se colocan en una ensalaera o en una huenti. Se pica el ahu y se añai la sal y el güevu picau (dalgunas presonas lu hadin fritu u pasau pol agua, comu mehol vus "peti) y l’adeiti, añaimus el choridu en trozinus chicus ( estu si se quieri) y se poni un poquinu d’azucal, se rebuha to bien y se vierte pol dencima a las narahas y limonis.
Ensalá ‘e naranha:
- Ingreyentis: Naranha, cebolla, ahu, sal, adeiti d’oliva, y azucal
Se hadin roahas finas conos limonis y las narahas y se colocan en una ensalaera o en una huenti. Se pica l"ahu y se añai la sal y l’adeiti y se vierti pol dencima.
Socochonis:
- Ingreyentis: Castañas pilongas, lechi, azucal y canela.
Se cuedin las castañas (tien que sel castañas pilongas) con abondu d’agua, en cuantu qu’esten bastanti amollecias (mu blandias) s’escurri l’agua y se ponin en un cazu cona lechi, l’azucal y la canela y se güelvin a ponel a la lumbri un ratinu asta que la canela de"l su sabol y aroma
Matahambris o Correas:
- Ingreyentis: Harina, lechi, agua, lúa y miel.
Se mestura agua la harina y la lúa pa hadel una masa ni mu rala ( que un quei mu espanzurrá) ni mu despesa y s’añai la lechi. Alúu con una cuchara o un cacinu se va vertiendu ena sarten con adeiti mu calienti pa fritalus. Cuandu esten doraus se sacan y s’escurrin y antonci se les añai miel pol dencima.
Las correas son igualis peru se hadin comu si hueran churrus vertiendu la masa con una harrina hadiendu la horma d’un caracol (comu si hueran churrus ) en l’adeiti mu calienti.
Torrihas:
- Ingreyentis: Pan duru, canela, güevus, lechi, azucal o miel.
S’arrebana el pan comu pa hadel pringás, se ehan en una huenti y se les vierti la lechi pa empapalas. Alúu se rebonzan con güevu y se fritan. Cuandu esten dorás s’escurri el adeiti y se colocan en una huenti andi se vayan a servil y se les añai pol dencima la canela y l"azucal o la miel.
Pringás:
- Ingreyentis: Pan duru, azucal o miel, lechi o vinu.
Se rebana el pan y se frita, s’escurrin y se colocan en un platu o huenti pa emborrachalas en vinu o lechi y azucal o miel sigún el gustu.
Gaspachu:
- Ingreyentis: Ahus, poleu, tomatis, un zalaqui ‘e pan, güevu cocíu, adeitunas, pepinus, cebolla,tomatis, adeiti, agua, vinagri y sal.
Nel morteru se machan lus ahus y se les añai una pisquina ‘e sal y el poleu, alúu s’añai l’adeiti y se macha pa hadel una pasta con un poquinu la miga "el pan. Se poni en una ensalaera y se añai el tomati y el pepinu cortau en trozus no mu grandis, la cebolla y pan en trozus y se vierti agua, adeiti y vinagri al gustu sigun mus peti.
Patatas escabechás:
- Ingeyentis: Patatas, ahu, harina, güevu, vinu brancu, agua, sal, aurel y adeiti.
Se cortan las patatas en roahas un mu gordas y se rebozan en güevu y harina pa fritalas. Una vedi fritás se ponin en una cazuela. Se macha un ahu y se vierti el vinu brancu se añai a las patatas conel agua,sal y una oha ‘e aurel y se cuedi to asta que las patas quein hechas.
Migas:
- Ingreyentis: Ahus, pan, agua, adeiti, sal, guinda picanti, (choridu), pimenton.
Se pica el pan en trozus chicus. Se dora el ahu en laminas (y si se quieri una guinda picanti) y cuandu este hechu se añái un pocu del pan qu’abemus picau con el pimenton y se regüelvi to mu bien con un pocu d’agua y la sal p’alúu añail to a las migas que teniamus reselvas aparti. Se regüelvi to muchu asta qu’esten to las migas hechas. Si se quieri se pue añail choridu pa que seyan mas consistentis y nutritivas ...
Sopas d’ahu:
- Ingreyentis: Pan, ahus, sal, adeiti, agua, güevu.
Se pica el pan y se va colocandu en cazuelitas de barru.Se pican lus ahus en roahas finas y se frita, se añai cuandu esten lus ahus doraus un pocu del pan qu’abemus picau y se frita pa alúu añail agua. Cuandu escomienci a cocel se vierti to enas cazuelinas andi abemus ehau el restu el pan picau.
Tamién se puen hadel vertiendu tol pan picau y cuandu escomienci a cozel s’añai to y se casca un güevu ena sopa removiendu bien pa rompelu.
Mohi picanti:
- Ingreyentis: Guindas picantis secas opimientus verdis o coloraus asaus.
Se cuedin las guindas asta que quein hechas, s"escurrin y se añai l"adeiti y la sal pol dencima.
El mohi se pue hadel con pimientus asaus y incrusu con ahus tiernus con guindas adeiti y sal.
01/06/2006
Estremáura es claramenti un topónimu de Reconquista, pues el nombri s’estilaba pa hucheal asina las tierras reconquistás a lus morus. Era el nombri ‘e lus estremus lus dominius reconquistaus. Ubu una estremáura castellana ena parti las tierras de Soria y Segovia, otra estremáura d’Aragón, una estremáura lionesa y el reinu e Portugal tamién tuvu la su estremáura.
La parabra estremu pa hucheal las zonas fronterizas o límitis vienin arrecohias en documetus del sigru IX enas variantis extremos, extremo, extrematura, extremadura extremitas... y acontinua usandusi nel sigru XII muandu lus límitis heográficus sigun ahila la reconquista
Nel reinu ‘e Lion tenemus referencias describías al amenidal el sigru XII nel diploma ‘el monasteriu ‘e Castañeda, en tierras Lionesas, alcontrandu el dichu “Extremis Dorii” pa mental a la estremáura lionesa, qu’en aquellus momentus atañía a Salamanca, concretamenti la comarca ‘e Ciuá Rodrigu y el nolti ‘e Cazris (Sierra ‘e Gata y Francia).
L’estremu o frontera nu era un espaciu heograficu establi sino dinámicu, variabli sigún se diba reconquistandu territoriu. Asina la estremáura castellana se hucheaba primeramenti a tierras de Soria (Soria pura cabeza de extremadura), Segovia pa alúu conel arrehuntamientu "e Toledu sel esti el lugal andi acabihaba la estremáura castellana y escomienzaba el reinu ‘e Toledu.
Asin la autual Estremáura, hue dendi el escomiezu parti ‘el territoriu reconquistau polos reinus de Lión y de Castilla, y el su nombri hadi referencia a esu mesmu, estremu, terrenu ‘e frontera.
Nel casu d’Estremáura, la muestra, la autual mus alcontramus que la parti oesti jue reconquista pol Rinu Líon y la parti esti pol Reinu Castilla enantis d’apellalsi en una sola corona. Pue guipalsi enos mapas sobri la reconquista que mas o menus el arrayu entri los dos reinus acontinaba a traves la viala plata, mas o menus comu sali nesti mapina:
Mapina apañau de Pahina presonal d'Antoniu Viudas Camarasa
28/05/2006
Sigun relata Gonzalo Martínez Díez nel su articulu "Extremadura: origen del nombre y formación de las provincias", espublicau nel Anuariu ?e Derechu de l?Univelsiá d?Estremáura, se pue establecel las siguientis fasis o momentus estóricus:
-En 1502 nacin las primeras 18 provincias de Castilla en hunción de las ciuais con votu en cortis, nu estandu entri ellas dinguna ?e las estremeñas. La mayol parti el territoriu estremeñu dependía altoncis de la provincia ?e Salamanca.
-En 1653 mercan un votu enas cortis, y polo tantu se crea pol primel vedi la provincia estremeña, las ciuais de Plasencia, Badahó, Méria, Truhillu, Cázris y Alcántara. Nesta provincia s?integran lus partius de Truhillu, la provincia ?e Lión de la Ordin de Santiagu (La autual comalca pacensi Tentudia) asín comu Coria y las tierras ?e Granailla.
-En 1789 el Condi ?e Floridabranca espublica una lista colas 38 provincias d?España, entri ellas la d? Estremaura, dividia en ochu partius: Alcántara, Badahó, Cázris, Llerena, Méria, Plasencia, Truhillu y Villanueva la Serena.
Entri el mapa ?e 1789 y l?autual ay tan sólu 20 poblacionis de Cázris que pertenecían a otras provincias:
El Gordu, Berrocalehu, Bohonal de Ibor y Talavera la Vieha a Ávila.
San Martín de Trevehu, Villamiel, Descargamaría, Robleillu ?e Gata, Bañus, La Garganta y Hervás a Salamanca.
Castañar de Ibor, Peraleda de San Román, Garvín, Valdecasa de Tajo, Villar de Ibor, Carrascalehu, Guadalupi y Alía a Toledu.
D?igual mou, eran sieti las poblacionis que un estaban encluias altoncis n?Estremadura y que oy pertenecin a Badahó: Valdecaballerus y Castilbrancu, situaus en Toledu. Higuera la Real, Fregenal de la Sierra y Bodonal de la Sierra en Sevilla. Olivenza y Táliga que pol altoncis eran portuguesas.
-En 1810 el gobielnu afrancesau estableci las prefecturas de Cázris y Méria.
-En 1822 se establecin las provincias de Cázris y Badahó. Nesta división, mu paecia a l?autual, entovía queaban poblacionis huera ?e las provincias de Cázris (Casaris de las Hurdes, Ladrillal, Nuñomoral, Pinofranqueau, Caminumoriscu, Descargamaría, Robleillu ?e Gata, Casal de Palomeru, La Pesga, Valdelacasa del Tahu, Villal del Pedrosu, Carrascalehu y Alía) y Badajoz (Valdecaballerus, Castilbrancu, Herrera ?el Duqui, Helechosa, Tamurehu, Fuenlabra lus Montis, Villarta lus Montis, Garlitus, Baternu, Peñalsordu, Capilla, Azuaga, Puebla el Maestri, Huenti l?Arco, Valverdi de Llerena, Malcocinau, Higuera la Real y Huentis de Lión.
-En 1833 se hadi l?autual división de provincias y sus poblacionis. Asin ya se contituyin las dos provincias de Cazris y Badahó la rehión d?Estremáura que agora tenemus.
- En 1978 se costituyi la Comuniá autonoma d?Estremáura y los sus limitis son lus mesmus que la rehion del mesmu nombri qu?esistia anteriolmenti.
Apañau d? Extremadura GenWeb
15/05/2006
ALANTRI EHTREMAÚRA
Alantri, Ehtremaúra, alantri, alantri,
Que mentrih puamuh aliental,
Dengunu te barrundirá;
Que mentrih puamuh aliental,
Ya no t' atollaráh.
De continu, yo runcharé
Con'a cahtúa pol pinsión;
Encima el suelu ehpenaré,
Pol efendelti, yo.
Alantri, Ehtremaúra, alantri, alantri,
Qu' arrempuhandu toh pol ti,
El mehmu sol t' embidiará;
Que labutandu toh pol ti,
De pobrecia saldráh.
Sempri en tu onol, queremuh sel
Un ñu d' unión, flama d' amol;
Embahu el cielu sempri adul,
Yo te quedré mejol.
PABLO GONZÁLVEZ GONZÁLEZ
12/05/2006
L'otru dia huricheandu ena redi m'alcontre con un blog andi tenian endilgau un escritu sobri la posibiliá que l'ehtremeñu juessi ofidial. Soñalssi é de valdi y güenu m'alcordau que n'otrus tiempus cuandu particiepaba nun simulaol politicu colos collacius Asturianus y Lionesis ena jormación d'un estau endependienti reahte argu paeciu a estu mesmu. Nu ehan 'e sel barruntaeras y cavilacionis d'un juturu que de siguru nunca sedrá peru güenu el soñassilu nu cuesta ná.
NORMALIZACIÓN LINGÜÍHTICA
- LA PALRA Y UÑIÓN SOCIAL
La Hunta Ehtremáura tieni conocencia que la comuniá lingüíhtica d?Ehtremáura é patrimoniu ehtóricu y atual de Cazris y Badahó, ensiendu mu compleha, rica y diferenti en toas las zonas. Atualmenti en to?l muestro país se puede oíl Ehtremeñu, A Fala del Val de Xalima, asín comu el portugués en diferentis puebrus.
Consideramus que la palra é un elementu ?e uñion social. Equilicua, qu? é mestel defendela y dessarrollala, medianti?l labutu los poeris púbricus, garantizandu el drechu ?e tos los ciuaanus a conocela y a comunicalssi ena su palra, en cualisquiera ?e los ámbitus propius ?e la ehpresión lingüíhtica, tantu enas ehcuelas, en tos los sus nivelis, comu enos meyius ?e comunicación y enas dihtintas Alminihtracionis púbricas.
El labutu n? esta materia debi d?inicialssi d? un mou inmediatu, pola difícil situación ena que s?alcuentra la palra comu ihtrumentu d?interrelación d?una parti ?e la población d?Ehtremaúra. Tenemus comprobau qu?en amplias zonas no se jadi ?l relevu heneracional, de mou que essihti?l riehgu ?e remplazu total del ehtremeñu pol cahtellanu.
Veleí que la Junta, precura desarrollal programas pala normalización del usiu l?Ehtremeñu nel conhuntu ?e la muestra Comuniá, siempri dendi la prehpehtiva ?el rehpetu mássimu a la realiá sociolingüíhtica. Esti asuntu essihi conocel, adatalssi y planifical d?alcuerdu colas peculiariais propias de ca una ?e las zonas sociolingüíhticas, ya que é evidenti que no se pué ehercel nesta materia ?el mihmu mou ena zona Gata-Jurdis qu?ena Siberia o ena Campiña Sul. Las capitalis y las grandis ciuais tamién debin ?e tenel el su propiu plan de normalización lingüíhtica, sin pelhuiciu ?e la essihtencia d? un plan diretol heneral. To ellu d?alcuerdu cola Ley Principal de Normalización del usiu l?ehtremeñu.
La política a desarrollal debi ?e tenel comu metas obligás los siguientis ohetivus:
1.- Aumental el númiru d?ehtremeñu palrantis.
2.- Mehoral la su competencia lingüíhtica.
3.- Amplial el repertoriu ?e huncionis y ámbitus del usiu l?ehtremeñu.
4.- Reforzal el miramientu l?ehtremeñu comu patrimoniu ?e toa la socieá, independientementi ?e la su ideolohía política.
- ATUACIONIS EHPECIFICAS ENA EDUCACIÓN
1.- Creación dun sihtema educativu con diferentis moelus (A y B ), remozandu la presencia l"ehtremeñu nel moelu A, luengua a la que se otorgaría un valol vehiculal ena enseñanza d?arguna ?e las árias o asinaturas. Sinembargu, creemus necesariu tendel a la superación paulatina d"esti sihtema y a la implantación d?otru, bilingüe, más integraol y flessibli.
2.- Labutación ?e planis que puean mehoral la caliá y cantiá ?e la oferta ?e librus "e tehtu, librus de consulta y cualisquiera d?otru tipu ?e material ehcolal ena palra ehtremeña.
3.- Cudiu ehpecial a la jormación ?el profesorau en to lu tocatimenti a la su capacitación lingüíhtica. É mehtel amplial la redi ?e centrus andi puean deprendel y mehoral las sus competencias lingüíhticas , animandu al profesorau, ahtualizandu el material diáhticu,?
4.- Favorecel l? usiu l?euhtremeñu comu palra ?e relación polos dagalis juera ?el ámbitu ?e las ehcuelas, creandu ahtiviadis con caráitil ehtraehcolal, deportivu, tiempu libri?
Al rehpehtivi l?anseñanza universitaria:
1.- Apuehta deciía pol una Universiá plurilingüe.
2.- Alivial el déficí essihtenti ?e profesoris que seyan ehcapacis lingüísticamenti n?ehtremeñu. Pa ellu, debin reahtalssi y ahilal planis pa deprendel y ehtuyu nel conocimientu ?e la muehtra palra pa poel conel tiempu enmendalssi esta situación.
3.- Apoyu a la invehtigación en y sobri l?ehtremeñu.
Güiqipeya Tallu POs creemi Raul qu\'entovia palramus asina unus cuantus [...]
Articulu 3 Joan L'inculte del comentari 1 es desqualifica per ell [...]
Güiqipeya Raúl Hola, Nací en Badajoz pero mi familia entera es [...]
El III Alcuentru de bailis y danzas de las comarcas asturlionesas. Álvaro Hola, estoy muy interesado en encontrar tesis doctorales [...]
Atitú lingüística Nelu Un saludín dende Asturies pa toos/es los/es collacios/es [...]
Añadir Feed a:
Archivo
| Quieres crear un Blog aquí
Sitio desarrollado, diseñado y gestionado 100% con Software libre: GNU/linux, GIMP, PHP, MYSQL, APACHE, ...
