Santibañez el Alto
03/12/2006
De qué ependi qu’un bilingüi nuna situación detelminá usi una o algotra palra? Ependi basicamentri ‘e dos fatoris. Pol un lau estan lus que raican nel propiu endividiu, la su conocencia ‘e las palras y la su atitú frenti a ella, el su nivel d’endintificación con cá una dellas y el su deseu d’usalas. Y pol algotra palti estan lus fatoris socialis, las nolmas que regulan el usu duna o algotra enas deferentis situacionis pubricas y privás.
En cuasi que tos lus bilingüis se puedi identifical una regulariá nel usu duna u l’algotra palra, ya que las atituis propias sobri las palras son relativamentri establis asin comu las situacionis y las nolmas son tamién establis y repetitivas enas que se puedi usal una o algotra palra.
L’aquisición de dos palras nunca es diguala maera, nunca se consigui e la mesma maera ni el usiu es el mesmu, siempri tiendi’l preominiu duna frenti algotra, y esti predominiu se mantieni a lu largu la via. La mayoría lus bilingüís son escapacis de identifical la que consieran la su palra prencipal. La palra prencipal el bilingüi sedrá la palra que conodi mehol y la qu’usa mas amenú y en situacinis mas variás, ena que tieni mas arbeliá, anque nu siempri es asina y pue suceel que la palra mas usá pola presonay aquella cona que se sienti edentificá nu seya la que mehol conoza o que mas usi en ciertas cercustancias, qu’es lu que l’aconteci a quien palra una luengua minoritaria y que nu tieni estrución denguna sobri la mesma y es polu que anque la consieri comu la su palra prencipal nu puedi usala enus usius escritus o hormalis. Anque cuasi siempri la palra prencipal ena mayoría lus chascus es la palra ena que mantieni las relacionis presonalis mas prohundas.
Heneralmentri lus bilingüis nu muan la su palra prencipal y la mantienin comu tal a lu largu ‘e to la su via, aque muacionis emportantis nel contestu social y enas relacionis presonalis puein provocal un nuevu equilibriu entri las palras y encrusu chambal una pol algotra comu palra prencipal.
Ay presonas bilingüís que son encapadis de idil cual es la su palra prencipal , conodin prefetamentri las dos palras, tien ocasión d’usalas endeferentementi, es lu que se huchea bilingüísmu funcional, el tenel la posibiliá del usiu dambas palras pol igual tantu enus ambitus privaus comu pubricus.
Y que aconteci ena palra ‘e las barruntaeras... nel chascu lus bilingüís, en que palra barruntan?. Ena mayoría lus chascus se idi qu’usan dambas palras endestintamenti anque siempri paici qu’es una la que predomina sonbri algotra qu’es la que se pue consideral la prencipal. Un bilingüi qu’usi dambas palras y tenga la posibiliá e hadelo en deferentes ambitus, de siguru enas sus barruntaeras hadra lu mesmu.
Pue dalsi el chascu que nuna mesma familia la palra que se usi con dalgunus y algotrus seya deferenti, estu ocurri en chascus de diglosia y cuandu la palra minoritaria esta mu restrinhía. Pa detelminal el usiu duna u algotra palra ependin abondu variablis comu las relacionis presonalis, el labutu, las relacionis interpresonalis, la palra mayoritaria y pubrica etc.
Las presonas escapacis d’usal dos palras nu solu posein competencias en dambas dos, tamién tienin atituis presonalis anti ellas y anti las sus posibiliais d’usalas; atituis que risurtan de la su estoria presonal que l’ án hechu adotal una comu la su palra prencipal y pol algotru lau razonis estralingüísticas ralacionás conel papel social que pretendi ocupal ena socieá de la que horma parti o sistema ‘e valoris pol que se rihi el su compoltamientu.
Nu vus suena las parabras prenda, dagalinu, chirivehi y dalgunas mas que son mu carisiosas y henuinacaenti estremeñas. A vel si dalgunu s’alcuerda y endilga unuas cuantas parabras cariciosas tipicamenti estremeñas.
Licencia:CC Reconocimiento NoComercial SinObraDerivada
Y'era hora e q'un ehtremeñu s'interesara pola nuhtra lingua q'esta tan abandona.Asiah a tol mundo que s'interesa po ista lingua tan respetable comu cualquiel otra.
Que juerti me paeci el ve una pahina e santibañi, ehcrita en cahtuo,entoavia no entendu q'un ehtremeñu no s'interesi pola nuhtra palra, pol la nuehtra curtura, soy santibañehu y me sientu orgullosu e sel`lo, y tamien e palral como lojizu er mi aguelu.Animu tallu.
Mu agraeciu pol tu comentariu enviniendu dun Santibañehu.
Alrespehtivi que seyan lus propius estremeñus lus que mas arregañu tengan a la palra y a las sus costumbris, es to un misteriu, anque craru influhin abondu variabris.
Me hadi ilusión que pol fin aiga un santibañehu dandu la su opinión del mi blog; ay que dali puliciá al puebru qu'anque este encaramu nel cotorru nu quie idil que nu seya puliu e visital y nu tenga abondu cosinas pa hadel, estu tamién tie miga verdá ...
Bienviniu y escribi siempri que te peti.
chacho tallu pero tu ereh santibañehu?pos na avel si me icis arguna pahina mah onde poel ve cosah en ehtremeñu,q no sabia q se llamaba cahtuo,y poel lee en mi palra antih q despaezca q me paehi ami q muchu orgullu no tien lo´ehtremeñoh de la su cahta!
Archivo
| Quieres crear un Blog aquí
Sitio desarrollado, diseñado y gestionado 100% con Software libre: GNU/linux, GIMP, PHP, MYSQL, APACHE, ...
