Santibañez el Alto

La Encamisá.

04/12/2006

En Torrehoncillu, un pueblinu e Cazris entri algotras haranas se hadi la Encamisá. La fiesta esta dedicá a la Pura o la Pringona, qu’es asina comu huchean a la virhin pol coinciil conel eniciu el pringui o matancia, y daina vieni tamien el moti lus torrehoncillanus “pringonis”
Ena nochi el sieti e diciembri ya acabihá la novena a la virhin las campanas la igresia repiquetean y la praza mayol s’enllena e henti entri lus que están lus escupeterus que hadin sarvas a la virhin, a la Pringona. Mentras un grupu e ombris en hacu (lus encamisaus) van an cata el mayoldomu andi recibin el farol que fruhiran duranti to la harana. Lus encamisaus van hateaus con grandis y pulias sabanas a mou e capa que les cubri dendi la mollera. El mayoldomu tamién fruhi una sábana mu pulía bordá cona imahin la virhin arrodeá d’estrellas azulis.

http://www.caceresjoven.com/paginas/turismo/extremadura/fiestas.asp?cod=27

To la corrobra ahila pa la praza andi hampa la igresia San Andrés y l’ayuntamientu andi es recivía con sarvas, coetis y el repiqueu las campanas mas lus gañius y vivas a la Pura. Nesi istanti l’estandarti la virhin es sacau del tempru pol cura y dau al mayoldomu. El estandarti lu fruhi el mayoldomu escoltau pol dos encamisaus y tras ellus tol restu lus hinetis y presonas, aina la henti entona el cantu:
Hué concibía, huisti sin mancha, Avi María enllena e gracia.

Eris Portera, eris María, eris la rosa d’Alehandría.

Patrona eris e toa España, rogal pol ella, Virhin sagrá.

Enbahu el tu mantu, mus cubrirás y a lus sordaus qu’en guerra estan.

Esta nochi y esti día, igamus tos ¡Avi María!

Nesti día y nesta nochi, cantal queremus el tu santu nombri.

Oliva verdi, paloma branca, eris qu’anuncias pas en el mundu.

Huenti pereni, podu e agua, andi la curpa nu tuvu entrá.

Tiéndi’l tu mantu, Patrona amá, qu’estás hormá sobri la guerra.

En tol tiempu tu mus amparas, peru ena muerti con mas costancía.
La procesión se hadi duranti dos oras y en ca lugal ardin hachas y horitañas ( capazus, hogueras, lumbris), se hadin salvas, canticus al pasu la corrobla qu’acabiha ena praza andi’l mayoldomu degüervi l’estandalti. Anque la procesión acabiha nesti momentu las sarvas y cuetis conduran ya que lus paladinis y encamisaus van an cá’l mayoldomu envitaus a bebel güen vinu y manducal coquillus.

www.plasenciaweb.com

A meya nochi, pol mesmu caminu que tie hechu la procesión aconteci la procesión el silenciu o la pinetencia, ena que asistin presonas toas enlutás y es un fretoriu a lus difuntus.
Sobri’l orihin la harana ay varius ententus pa argumental el su orihin unus idin que vieni de cuandu el ehercitu español anduvu sitiau pol francés nuna nochi ivielnu, algotrus idin que vieni de la reconquista e Cazris peru tos idin que se piyó a la virhin que les sacasi del atolladeru. La virhin s’aparecio dandu ordinis, asina que tol ehercitu se hateo solu conas camisas pa que la brancura las mesmas entri la nievi aturullara’l moru o gavachu sigún el chascu.
Ay tamién algotrus que idin que la harana vieni de muchu mas d’antañu de la epuca lus vetonis, el curtu al caballu, la nochi y el fuegu paici que teini que vel cona diosa Ataecina y alúu dispués la igresia catolica l’asimilo ena virhin. Y asina paici que vieni a sel sigún lus estuyus antropolóhicus y de comparancia que se tienin hechus con haranas similaris en lugaris cercanus comu Navalvillar de Pela (Badahó) el 16 e heneru; pa puebrus de Zamora y Ávila tamién se hadin cerebracionis mu paecias.

Pa tol qu’andi enteresau, la Corrobla e Paladinis de Torrehoncillu, ofreci la posibiliá de guipal en diretu el sieti e diciembri a las 22:00h. lus momentus e mayol emoción y holgoriu, la entrá y salía l’estandarti la virhin, pa lu que tien estalá una cámara y dendi la web www.laencamisá.org se pue siguil y particiepal dendi tol mundu.

Licencia:CC Reconocimiento NoComercial SinObraDerivada

Comentarios

Escribir Comentarios

Nombre:

Correo Electrónico:

http://:

Comentario:

Etiquetas html permitidas: <a href> <em> <blockquote> <strong> <cite> <code> <ul> <li> <dl> <dt> <dd>

Recordar datos:

Inicio | Archivo | Categorías

Búsqueda

Palabra o Frase

Posts Comentarios

Sindicar

Post (RSS2)

Añadir Feed a:

Bloglines Feedness Google Reader Mi Yahoo Mi Msn Rojo Pluck Newsgator SearchFox Bloxor