Santibañez el Alto
27/01/2008
La valoración que se hadi d’Estremaura enus deferentis perious estoricus son mu deferentis sigún la mirá de quien lu haga. En heneral desisti un desconocimientu heneral de la hormación estoricu-geografica y de la su estrutura sociuecunómica, huerapalti la socio-curtural.
La mayol palti las vedis se puen vel enus testus estóricus una entedeltminación del territorio, apareci endefinia comu un espaciu e transitu, de pasu, de naidi de frontera; lu que hadi que nu se reconoza la su idiosincrasia ni tan siquiá la su desistencia comu enti deferenti intrarehional.
Asina, la mayol palti las vedis lu que puemus alcuentral es una mestura de caraiteristicas sigún la proceencia lus autoris enventandu encrusu las traicionis y manifestaciones curturalis que se dan en Estremaura.
Enus sigrus XVIII y XIX , muestran una Estremaura comu una realia entri Andalucia y Portugal. Es idil endetermina; asina queriendu describil las costumbris y particulariais lus estremeñus puesmus alcuentral que mus definian comu : sencillus, francus, sacrificaus y comu, aislaus, arretrasaus, hentiñosus y mu endividualistas.
Asina tenemus al clerigu e haraiceñu, Franciscu Gregoriu de Salas que eico a lus sus paisanus hidiendusi ecu e lus estereotipus del sigru XVIII lu siguiente:
Espíritu desunido
anima a los extremeños;
jamás entran en empeños,
ni quieren tomar partido.
Cada cual en sí metido,
y contento en su rincón,
aunque es hombre de razón,
vivo ingenio y agudeza,
vienen a ser por pereza
los indios de la nación.
Mas alantri nel tiempo prehentan Estremaura comu la ruta la corcha y a la su henti comu pastoris, puebru e campusinus o de harotis, comu llamaban sigún Antoniu Rodriguis Moñinu a lus ihus d'estremaura lus pastoris castellanu y lionesis pola albondancia e gorrinus ena rehión. Tolus ententus o maeras de describil a Estremaura y a lus estremeñus es meyanti el su atrasu respetu a otrus lugaris, lus esterotipus que comu tengu idiu silvin pa economizal el pensaeru se trasmitin y se perpetuan reprouciendusi mecanicamenti a pesal del pasu'l tiempo.
Estremaura polu tantu de siempre á siu carateriza pola situación, periférica, estrema y fronteriza; despobrau y de repobración mita castellana mita lionesa, zalacha en dos mitais, sin concencia d’uñia. A pesal de qu’en 1548 Pedru e Medina nel su libru “Libro de las grandezas y cosas memorables de España” tiene crara concencia de lu qu’es Estremaura geograficamenti. Diegu Peris de Mesa en 1595 ena obra “Adiciones” descrinbi caraiteristicas curturalis de lus estremeñus. Huan Soropan de Rierus en 1616 nel libru “Medicina española contenida en proverbios vulgares” describi la geugrafia d’Estremaura . En 1606 el padri Franciscu e Coria ena obra “Descripción e historia general de la provincia de Extremadura” da una visión uñia, conhunta de toa Estremaura.
A pesal de to estu, entovía tenemus que sentil qu’en Estremaura desitin dos paltis, que semus arretrasaus, pastoris, haraganis, sin concencia d’uñia. La inorancia sobri lu desconociu hadi que se perpetuin lus estereotipus pol mu viehus que seyan. Y esta enas muestras manus el chambal la idea que sobri musotrus tiene huera y lu mas emportanti y que nu me cansu e repetil, musotrus mesmus tenemus que mual pol compretu la idea que sobri musotrus mus tien empuesta.
Licencia:CC Reconocimiento NoComercial SinObraDerivada
Voy a hacer publicidad de tu blog en el mío porque el extremeño es algo que todo el mundo debe conocer. Igual que los andaluces, los asturianos, los valencianos, los catalanes, los gallegos, los vascos y todos están orgullosos de sus lenguas nosotros hemos de estarlo también y hacer publicidad de ella.
Archivo
| Quieres crear un Blog aquí
Sitio desarrollado, diseñado y gestionado 100% con Software libre: GNU/linux, GIMP, PHP, MYSQL, APACHE, ...
